PDIU: Vendimi i Kushtetueses për kombësinë, i drejtë

Partia Drejtësi, Integrim dhe Unitet përshëndet vendimin e Gjykatës Kushtetuese për shpalljen e antikushtetueshmërisë së termit kombësi në ligjin e gjendjes civile.
 

Në një deklaratë për shtyp, PDIU-ja thekson se në bazë të këtij vendimi, Shqipëria u atashohet vendeve perëndimore ku koncepti i kombësisë nuk është më i lidhur me konceptin e etnisë, por me atë të shtetësisë.
 

“Në këndvështrimin tonë, ky vendim është i drejtë dhe ka ardhur në kohën e duhur. Për sa i përket censusit, PDIU i bën thirrje INSTAT që të zbatojë amendamentet e PDIU-së, që e detyron të verifikojë dhe ballafaqojë e të dhënat e grumbulluara gjatë censusit, sipas detyrimit të saj në bazë të ligjit për censusin” thekson PDIU-ja.
 

Ndërkaq, kjo forcë politike i bën thirrje INSTAT të verifikojë të dhënat mbi hyrje-daljet në Republikën e Shqipërisë, në mënyrë që të garantohet që asnjë jorezident të mos përfshihet në statistikat e censusit.
 

“Në këtë mënyrë garantohet që asnjë abuzim të mos zhvillohet mbi të dhënat që do të rezultojnë nga censusi i popullësisë” thekson PDIU-ja.