PEKIN – Udhëheqësi kinez Xi uron Trump, bën thirrje për bashkëpunim
PEKIN, 7 nëntor /ATSH-DPA/- Presidenti kinez Xi Jinping uroi Donald Trump për fitoren e tij në zgjedhjet presidenciale në SHBA, ndërsa bëri thirrje për bashkëpunim dhe jo për konfrontim.
“Historia ka treguar se Uashingtoni dhe Pekini fitojnë nga bashkëpunimi dhe humbasin nga konfrontimi”, tha Xi, sipas agjencisë shtetërore kineze të lajmeve “Hsinhua”.
“Një marrëdhënie e qëndrueshme dhe e shëndetshme midis Pekinit dhe Uashingtonit është gjithashtu ajo që pret komuniteti ndërkombëtar”, tha udhëheqësi kinez.
“Kina shpreson që dallimet e opinioneve do të menaxhohen siç duhet – dhe bashkëpunimi reciprokisht i dobishëm do të zgjerohet”, tha ai.
Transmetuesi amerikan CNN raportoi se Trump dhe Xi kishin biseduar në telefon.
Marrëdhëniet diplomatike mes SHBA-së dhe Kinës janë të tensionuara.
Uashingtoni ka bërë akuza serioze kundër Pekinit, duke përfshirë shkeljet e të drejtave të njeriut, praktikat e padrejta tregtare dhe pretendimet e paligjshme territoriale në Detin e Kinës Jugore.
Pekini, nga ana tjetër, akuzon SHBA-në për pengimin e qëllimshëm të zhvillimit të tyre ekonomik me sanksione dhe tarifa, dhe për ndërhyrje në punët e tij të brendshme si një fuqi hegjemoniste.
Trump miratoi një qëndrim të ashpër ndaj Kinës gjatë mandatit të tij të parë në detyrë. Gjatë fushatës zgjedhore, ai paralajmëroi se do të vendoste tarifa të mëtejshme për produktet kineze, të cilat mund të kishin një ndikim masiv në tregtinë botërore.//a.i/