PROJEKTLIGJ PER DISA NDRYSHIME DHE SHTESA NË LIGJIN NR.9739, DATË 21.5.2007, “PËR SHËRBIMIN E TRANSFUZIONIT TË GJAKUT NË REPUBLIKËN E SHQIPËRIS˔

P R O J E K T L I GJ

PËR

DISA NDRYSHIME DHE SHTESA NË LIGJIN NR.9739, DATË 21.5.2007, “PËR SHËRBIMIN E TRANSFUZIONIT TË GJAKUT NË REPUBLIKËN E SHQIPËRISË”

Në mbështetje të neneve 78 dhe 83, pika 1, të Kushtetutës, me propozimin e Këshillit të Ministrave, Kuvendi i Republikës së Shqipërisë

V E N D O S I :

Në ligjin nr.9739, datë 21.5.2007, “Për shërbimin e transfuzionit të gjakut në Republikën e Shqipërisë”, të bëhen këto ndryshime:

Neni 1

Neni 10 ndryshohet, si më poshtë vijon:

“Neni 10

Gjaku, produkt i mbledhur dhe i shpërndarë pa fitim

1.     Gjaku njerëzor nuk mund të përdoret në shërbimin shëndetësor për qëllime fitimi. Shpenzimet për procedurat e kontrollit,të përpunimit dhe të shpërndarjes së gjakut e të përbërësve të tij, në asnjë rast,nuk përballohen nga pacienti. Këto shpenzime i mbulohen Shërbimit Kombëtar të Transfuzionit të Gjakut nga institucionet shëndetësore, që e përfitojnë këtë shërbim.

2.     Kostoja për secilin nga shërbimet e përcaktuara në pikën 1, të këtij neni, përcaktohet me urdhër të ministrit të Shëndetësisë.”.

Neni 2

Në nenin 12 bëhen ndryshimet e mëposhtme:

1. Pas shkronjës “b”, të pikës 1, shtohet shkronja “c”, me këtë përmbajtje:

“c) mënyrën e lëvrimit të fondeve për veprimtaritë promovuese dhe edukative në fushën e transfuzionit të gjakut.”.

2. Pika 2 ndryshohet, si më poshtë vijon:

“2. Ministri i Shëndetësisë përcakton kërkesat e bazës organizative e teknike të strukturave, si dhe të veprimtarive promovuese e edukative të shërbimit të transfuzionit.”.

Neni 3

Pas nenit 13 shtohet neni 13/1, me këtë përmbajtje:

“Neni 13/1

Financimi i organizatave jofitimprurëse, që promovojnë dhurimin vullnetar të gjakut

1. Qendra Kombëtare e Transfuzionit të Gjakut financon, me fondet buxhetore, të dhëna për këtë qëllim, shpenzimet e promocionit të çdo organizate jofitimprurëse (OJF), që promovon dhurimin vullnetar të gjakut.

2. Kostoja e promocionit për çdo dhurim dhe mënyra e financimit të promocionit të OJF-ve përcaktohen me vendim të Këshillit të Ministrave.”.

Neni 4

Ky ligj hyn në fuqi 15 ditë pas botimit në “Fletoren zyrtare”.

K R Y E T A R I

JOZEFINA TOPALLI