PS: Berisha e përdor çështjen e imunitetit për të mbuluar dështimet

Partia Socialiste e quan dështim të planit të Berishës për të gjunjëzuar drejtësinë mosmiratimin e nismës për heqjen e imunitetit. Deputetja e PS, Mimi Kodheli, tha se në fakt Berishës nuk i intereson aspak imuniteti, por kërkon të mbulojë dështimet e tij.

Ditën e hënë plani i Sali Berishës për të mbajtur të gjunjëzuar drejtësinë në këmbim të heqjes së imunitetit, dështoi. Sali Berisha u detyrua të dorëzohej dhe të pranonte realitetin: Kushtetuta është ligji themelor i shtetit dhe nuk mund të ndryshohet sa herë të na teket. Për ne socialistët, çështja e imunitetit është një çështje e mbyllur, për kufizimin e të cilit të gjitha palët janë dakord.

Socialistët janë jo vetëm nismëtarët për ta kufizuar imunitetin, por edhe votuan pro, nen për nen dhe në parim për projektligjin e dakordësuar. Ajo që ne socialistët dhe njerëzit e thjeshtë të këtij vendi nuk mund të pranojmë është një qeveri si kjo e Sali Berishës. Ne nuk mund të pranojmë që imuniteti të konsiderohet si tejet i rëndësishëm për integrimin europian (gjë që është e vërtetë), kurse pavarësia e sistemit të drejtësisë, lufta kundër korrupsionit apo çrrënjosja e kulturës së pandëshkueshmërisë të injorohen totalisht nga kjo qeveri. Ne socialistët nuk do të pranojmë që drejtësia në Shqipëri të vazhdojë të mbetet e gjunjëzuar përpara pushtetit të Sali Berishës, nuk mund të pranojmë që ky pushtet të vazhdojë të vjedhë Shqipërinë teksa shqiptarët varfërohen, tha Kodheli.

Në fakt, Berishës nuk i intereson aspak imuniteti. Atij nuk i intereson as integrimi i Shqipërisë. Njësoj si kur e zgjodhi Presidentin në kundërshtim të hapur me kërkesën e Bashkimit Europian për konsensus. Njësoj siç ka vepruar gjatë gjithë këtij viti, duke rrezikuar ta ngelë Shqipërinë në klasë për të tretën herë vetëm e vetëm se qeveria e tij nuk di të bëjë detyrat e shtëpisë. E vërteta është se e gjithë kjo propagandë e kësaj qeverie synon thjesht dhe vetëm të mbulojë dështimet e këtij pushteti.

Mimi Kodheli foli për situatën alarmante ekonomike e sociale në Shqipëri.

Dje një grua u vra, ndërsa e motra u plagos në tentativë e sipër për tu grabitur, në mes të Tiranës. Raste të tilla po dëgjojmë çdo ditë. Njerëz të dëshpëruar që i japin fund jetës, qytetarë që ekzekutohet në mes të qyteteve për arsye banale, dhe sa e sa të tjerë që humbin jetën çdo ditë në aksidente rrugore. Shqiptarët sot janë më të varfër dhe kriza që ka përfshirë çdo familje e çdo biznes ndihet me shumë se kurrë. Listat janë shtuar, çmimet janë rritur, shqiptarët janë varfëruar. Dhe në vend që ti përkushtohet punës që duhet të bënte e për të cilën paguhet, kryeministri vetëm flet duke mos bërë asgjë.

Deputetja e PS përsëriti qëndrimin e tyre që nëse do bëhet referendum, qytetarët të pyeten dhe për marrëveshjen e detit, për importin e plehrave dhe për ndryshimet kushtetuese të propozuara nga PS.

Tani na ka hedhur idenë e mbajtjes së referendumit. Shumë dakord për referendumin, por bashkë me votën për kufizimin e imunitetit, për të cilin të gjitha palët janë dakord se duhet hequr, të fusim në referendum dhe të kërkojmë mendimin e qytetarëve edhe për propozimet tona që sigurojnë një drejtësi të pavarur. Të kërkojmë mendimin e shqiptarëve edhe për ligjin që lejon importin e plehrave. Tu kërkojmë bashkëqytetarëve tanë të shprehen edhe për hapësirën detare që Sali Berisha do tu falë për së dyti fqinjëve tanë. Shqiptarët le të vendosin dhe do të vendosin.