Palestina synon anëtarësimin në UNESCO

Bordi i agjencisë së OKB-së për kulturën, UNESCO, ka pranuar të shqyrtojë kërkesën e Autoritetit Palestinez për anëtarësim të plotë.

40 nga 58 anëtarët e bordit mbështetën projekt/rezolutën palestineze. Shtetet e Bashkuara ishin mes 4 anëtarëve që votuan kundër, ndërkohë që 14 të tjerë abstenuan.

Drafti do t’u paraqitet të 193 vendeve anëtare në fund të muajit. Ai është një tjetër hap në kuadër të fushatës së diplomatëve palestinezë për njohjen e Palestinës si shtet.

Por fushata në fjalë kundërshtohet ashpër nga Kuarteti dhe Izraeli, që thonë se shteti i pavarur palestinez mund të krijohet vetëm përmes negociatave me palën izraelite.