Parlamenti cek voton Pro: Shqipëria në NATO
PRAGE- Dhoma e Deputetëve të Çekisë ratifikoi dje Protokollin e Anëtarësimit të Shqipërisë dhe Kroacisë në NATO-n. Protokolli do të firmoset më pas nga Presidenti cek, Vaclav Klaus.
Deputetët komunistë të parlamentit Cekë ishin kundër zgjerimit të NATO-s. Zëdhënësja e tyre, Katerina Konecna argumentoi se as Shqipëria dhe as Kroacia nuk kishin plotësuar kriteret e kërkuara. “Strategjia e NATO-s është një koplje e keqe e strategjisë ushtarake të Amerikanëve” tha Konenca.
Në takimin e Ministrave të Jashtëm të NATO-s që u zhvillua pak ditë më parë u deklarua mbështetja ndaj Shqipërisë dhe Kroacisë për anëtarësimin e tyre në samitin e ardhshëm që do të zhvillohet në Strazburg dhe Kehl, gjithnjë nëse procesi i ratifikimit ka përfunduar deri atëherë.
Cekia bëhet kështu shteti i 13 i cili ratifikon protokollin e anëtarësimit të Shqipërisë dhe Kroacisë në NATO-n. Po dje protokolli u ratifikua edhe nga parlamenti spanjoll. Gjithashtu pro anëtarësimit të Shqipërisë dhe Kroacisë në NATO kanë firmosur edhe SHBA, Slovakia, Hungaria etj.
Kryetarja e Kuvendit të Shqipërisë,Jozefina Topalli nga ana e saj shprehu mirënjohjen dhe vlerësimin e saj, si dhe të Kuvendit të Shqipërisë, Kryetarit të Dhomës së Deputetëve të Çekisë z, Miloslav Vlcek.
(s.g/BalkanWeb)