Partizani kap Dinamon në krye
• Nga kërcënimi për bojkot në triumf. Partizani kthen përmbys gjithçka në “Niko Dovana”, duke shpalosur hapur ambiciet për titullin kampion.Të besuarit e Hasan Likës e kanë shfrytëzuar në maksimum “mbytjen e nëndetëses blu” në gjirin e Shëngjinit dhe kanë arritur me pikë dinamovitët në renditje. Përmes një takimi dramatik dhe plot emocione kryeqytetasit kanë ndërprerë serinë e ndeshjeve pozitive të Teutës së Kristaq Miles, duke i shkaktuar Teutës një humbje të rëndë në shtëpi. Ndonëse ekipi bregdetar ka kaluar i pari në avantazh, nuk ka ditur të administrojë. Golit të minutës së 40-të, me firmën e Vangjel Miles, miqtë i janë përgjigjur dy herë me anë të Abilaliajt, i cili ka vulosur njëkohësisht edhe një dygolësh personal me vlerë prej tri pikësh. Ndër rezultatet e tjera të ndeshjeve të javës së 24-t që u luajtën dje, për t’u veçuar fitorja e Vllaznisë në transfertë kundër Kastriotit. Ndërsa ka humbur minimalisht Tirana në Peqin përballë Shkumbinit. Gjithashtu, suksese të rëndësishme për Elbasanin ndaj Skënderbeut dhe Flamurtarin kundër Besës.