Pelegrini në finish, pesë trajnerë në garë për Realin

Përforcohen sërish kritikat ndaj teknikut të Real Madridit, Manuel Pelegrini, dy ditë pas humbjes së “merengues” në “Bernabeu” kundër Barçës (0-2): i gjithë shtypi sportiv e shikon të larguar, ndërsa Murinjo avancon mes zëvendësve të mundshëm. “Pelegrini, i kryqëzuar”, titullon gjithë faqen “Marca”, e cila prej kohësh kërkon dorëheqjen e kilianit. Për të përditshmen “paaftësia për të menaxhuar grupin e lojtarëve, mungesa e karakterit për të pranuar kritikat dhe mungesa e përgjigjes së lojtarëve në ndeshjet e mëdha”, e kanë lënë pa mbështetje mes lojtarëve dhe drejtuesve të klubit. Lista e trajnerëve që mund ta zëvendësojnë sezonin e ardhshëm drejtohet, sipas “Marca”-s, nga Murinjo, të cilin e ndjekin Kapelo, Ançeloti, Skolari e Benitez. Edhe “As” kërkon kokën e Pelegrinit dhe i propozon “Murinjos të firmosë menjëherë”, para se të fitojë Champions dhe t’i rritet çmimi. Këtij grupi i bashkohet edhe e përditshmja sportive katalanase “Sport”, që nuk e shikon më Pelegrinin si trajner të Realit dhe zëvendësin e tij, sipas saj, janë Zhoze Murinjo dhe Rafa Benitez.