Përgjimet, miliarderët Murdok, dëshmi në Parlament

Edhe pse fillimisht kishin refuzuar, pronarët e kompanisë News Corporation, e cila është përfshirë në skandalin më të madh të përgjimit në Britani, Rupert dhe Xhejms Murdok do të paraqiten përpara anëtarëve të Parlamentit britanik të martën e ardhshme, për tu pyetur rreth këtij skandalit që nisi me News of the World dhe shkaktoi mbylljen e gazetës 168-vjeçare, pjesë e kësaj korporate. Ata nuk janë shtetas britanikë dhe nuk janë të detyruar të paraqiten në Parlament. Por, një lloj presioni nga përfaqësuesit e komitetit të deputetëve duket se ka bërë punë. Pasi fillimisht Xhejms tha se atë datë që ishte gjyqi, ai ishte shumë i zënë, më vonë njoftoi se do të paraqitej në seancë. Ndërkohë, drejtoresha ekzekutive e News International, Rebeka Bruks, ka rënë dakord për të ndjekur seancën. Dje u krye edhe një tjetër arrestim në lidhje me skandalin e përgjimeve të gazetës më të shitur në Britani. Ish-redaktori i News of the World, 60-vjeçari Neil Wallis, u arrestua dje herët në mëngjes. Ai është personi i nëntë që arrestohet lidhur me çështjen e përgjimeve. Seanca dëgjimore për dëshminë e miliarderëve Murdok do të kryhet ditën e fundit të punës së Komisionit të deputetëve, para pushimeve verore.