Presidenti i ri, ambasadori Arvizu takon Fatos Nanon

Ambasadori i SHBA-së në Tiranë, Aleksandër Arvizu ka takuar për herë të dytë të kandidatin e vetëshpallur për postin e Presidentit të Republikës, Fatos Nano.
 

Takimi po mbahet në një nga lokalet e kryeqytetit në zonën e Ish-bllokut dhe vjen një ditë para seancës parlamentare, kur pritet të caktohet edhe data e zhvillimit të raundit të tretë të votimit në Kuvend për presidentin.
 

Ndërkohë, nëpërmjet një deklarate për shtyp ditën e djeshme, Nano u bëri dje thirrje liderëve kryesorë të politikës shqiptare që të mbashkohen në një Aleancë të Madhe Mirëbesimi, “për të ndërtuar proçese të mirëbesuara e mirëkuptuara në mënyrë që të sigurohen prokute demokratike, të lira, properëndimore, proeuroatlantike”.

"Për të përmbushur kriteret e nevojshme të integrimit europian dhe reformat që i nevojiten vendit “Shqipërisë nuk i duhet një president i dobët, i trysnueshëm, i joshshëm nga pushtetet dhe loja politike e palëve, apo josipërmarrës dhe mostrazues i ujërave. Shqipërisë, i duhet një president dalëzots” dhe për këtë ai vazhdon t`i ofrohet vendit" ka shtuar Nano.

Dy raundet e para të votimit kanë dështuar pasi dy palët kryesore politike në vend nuk kanë arritur të çojnë një kandidat konsensual për kreun e ri të shtetit.
 

Nëse edhe ky raundi dështon, atëherë shanset për një kandidat konsensual janë të pakta. Pas raundit të tretë Presidenti mund të zgjidhet edhe me shumicë të thjeshtë, me 71 vota.