Presidenti kërkon realizimin e reformave që premtoi gjatë fushatës
Francë
Mes tyre edhe taksa e transaksioneve financiare
Presidenti francez, Hollande këtë verë, që është e para e tij në Presidencë, po merret me realizimin e reformave që premtoi gjatë fushatës elektorale. Tashmë edhe pas zgjedhjeve të përgjithshme ai mund të mbështetet për miratimin e ligjeve edhe në një shumicë të qëndrueshme në Parlament. Presidenti i parë socialist në Francë që prej vitit 1995, kishte premtuar në fushatën elektorale se në 2013-n Franca do të përmbushë sërish rregullat e BE-së për deficitin buxhetor. Sipas këtyre rregullave, deficiti buxhetor nuk duhet të jetë më shumë se 3% e Produktit të Brendshëm Bruto. Vitin e kaluar ai ishte 5,2 %. Me paketën e reformave, qeveria e majtë franceze distancohet në mënyrë demonstrative nga politika e paraardhësve konservatorë të ish-presidentit Nikolas Sarkozi. Bashkë me rritjen e taksave janë kthyer një numër projektesh të ish-presidentit konservator. Ndër të tjera socialistët rrëzuan çlirimin nga tatimi i orëve të punës shtesë dhe të ashtuquajturën “TVSH sociale”. Kjo e fundit pritej të futej në muajin tetor për të lehtësuar sipërmarrjet nga shpenzimet sociale. Veç kësaj do të shkurtohen me 30% rrogat e Presidentit Hollande dhe Kryeministrit Jean-Marc Ayrault. Taksa mbi transaksionet financiare e vendosur që në kohën e Sarkozisë është ashpërsuar nga socialistët. Ajo do të jetë 0,2% ose dy herë më e lartë nga sa ishte parashikuar prej qeverisë së mëparshme konservatore. Kjo taksë fillon të zbatohet nga 1 gushti 2012 dhe aplikohet mbi transaksionet me letra me vlerë të sipërmarrjeve me seli në Francë. Prej saj përjashtohet tregtia me aksione e shoqërive me një vlerë burse më të ulët se 1 miliard euro. Një taksë mbareuropiane për transaksionet financiare për të gjitha transaksionet dhe produktet në tregjet financiare deri tani nuk është e mundur, për shkak të kundërshtimit të vendeve si Britania e Madhe. Të paktën nëntë shtete synojnë megjithatë vendosjen e një takse të tillë në kuadër të një “bashkëpunimi më të ngushtë”. Ndër to është krahas Francës edhe Gjermania. Partia konservatore franceze UMP i kritikoi reformat si armiqësore për sipërmarrjet dhe të dëmshme për Francën. Kështu vendi do të humbasë më shumë nga aftësia e tij konkurruese në krahasim me vende si Gjermania, u tha nga përfaqësues të partisë së madhe opozitare gjatë votimit në Parlament të buxhetit shtesë. UMP kërkon masa më të forta kursimi në vend të rritjes së barrës fiskale.
Presidenti kërkon realizimin e reformave që premtoi gjatë fushatës burimi: Gazeta S H Q I P Gazeta Shqip