Prishtina shkel Mitrovicën

Sigal Prishtina e ka dërrmuar Mitrovicën, duke e mposhtur në shtëpi të vet me 101 pikë epërsi, 133:32. Ky ishte njëri prej rezultateve më të thella në basketbollin e pasluftës. Mitrovica shënoi aq pak pikë, sa që nuk mbahet në mend të ketë ndodhur ndonjëherë që një skuadër për 40 minuta të shënojë 32 pikë, ose më saktësisht 8 pikë për një çerek. Nga Moral Pozhegu më 27 shkurt 2011 në ora 12:47

Sigal Prishtina e ka shkel Mitrovicën të shtunën, në ndeshjen e parë të xhiros së 16-të të BKT Superligës së Kosovës në basketboll. Bardhekaltrit e shënuan njërën prej fitoreve më të thella në basketbollin e pasluftës.

Epërsia e tyre ndaj djelmoshave të rinj mitrovicas ishte plot 101 pikë, 133:32. Prishtinasit gjatë vjeshtës e kishin arritur fitoren më të thellë në vitet e fundit pikërisht ndaj Mitrovicës, 160:51, respektivisht +109 pikë epërsi.

Me të vërtetë, mitrovicasit shënuan shumë pak pikë. Ata realizuan vetëm 32 pikë gjithsej, në 4 periudha nga 10 minuta, që i bie vetëm 8 pikë për një çerek. Kjo nuk i kishte ndodhur asnjë ekipi kosovar në Superligë, në basketbollin e pasluftës.

“Rezultat më të thellë më parë ka pasur, por t’i shënojë një ekip aq pak pikë nuk ka ndodhur asnjëherë në Superligë pasluftës”, ka thënë komisari i garave i Federatës së Basketbollit të Kosovës, Nazmi Paçarada.

Të dielën, përcjellësi i bardhekaltërve, Bambi, pret po ashtu fitore në udhëtimin që do ta ketë në Vushtrri, ku e pret Kosova vendëse. Ndërsa kryendeshja e kësaj xhiroje do të zhvillohet në Mitrovicë, ku Trepça do të jetë mikpritëse e Pejës në ndeshjen e fundit.