Propozimi për armëpushim, SHBA hedh poshtë përgjigjen e Hamas: E papranueshme!
I dërguari i Presidentit Donald Trump në Lindjen e Mesme, Steve Witkoff e hodhi poshtë si krejtësisht të papranueshme përgjigjen e Hamasit ndaj propozimit të SHBA për një armëpushim të përkohshëm në Gaza.
Hamasi iu përgjigj propozimit të armëpushimit të SHBA-së duke thënë se është i gatshëm të lirojë 10 pengje izraelitë të gjallë dhe 18 pengje të vdekur në këmbim të një numri të burgosurish palestinezë, ndërsa kërkoi disa ndryshime në plan.
Grupi përsëriti kërkesat e tij për një armëpushim të përhershëm, një tërheqje të plotë izraelite nga Gaza dhe garanci për rrjedhën e vazhdueshme të ndihmës humanitare. Nuk ishte as një refuzim i qartë dhe as një pranim i qartë i kushteve amerikane, të cilat Uashingtoni thotë se Izraeli i ka pranuar.
Në një postim në rrjetet sociale, Witkoff tha se kundër-propozimi i Hamasit e kthen situatën pas.
“Hamasi duhet ta pranojë propozimin kornizë që kemi paraqitur si bazë për bisedime të afërta, të cilat mund t’i fillojmë menjëherë këtë javë që vjen. Kjo është e vetmja mënyrë që ne mund të mbyllim një marrëveshje armëpushimi 60-ditor në ditët në vijim dhe të mund të zhvillojmë negociata thelbësore në bisedimet e afërta për të arritur një armëpushim të përhershëm”, shkroi zyrtari amerikan.
/rtsh.al/