Pr.rezoluta e PS, delegacioni i BE për ATSH: Nisma të zhvillohet në përputhje me angazhimet e procesit të anëtarësimit në BE

TIRANË, 13 maj /ATSH/ Delegacioni i Bashkimit Evropian në Tiranë reagoi sot lidhur me projektrezolutën antikorrupsion të  propozuar nga Partia Socialiste

“Delegacioni i BE-së mirëpret çdo nismë për të çuar më tej proceset e arritjeve të reformave të Shqipërisë për qeverisjen e mirë, shtetin e së drejtës dhe antikorrupsionin, duke u mbështetur te reformat dhe arritjet e mëparshme, si dhe në përputhje me parimin kushtetues të kontrollit dhe balancimit”, thuhet në reagimin e delegacionit të BE për Agjencinë Telegrafike Shqiptare.

“Ne theksojmë se është e rëndësishme të garantohet që kjo nismë do të zhvillohet në koherencë të plotë me gjetjet e raporteve të shqyrtimit analitik të legjislacionit (procesi screeening) dhe me angazhimet që ka marrë Shqipëria si pjesë e procesit të anëtarësimit në BE, si udhërrëfyesit për shtetin ligjor dhe administratën publike”, thuhet më tej në reagim.

Për sa i përket sektorit të drejtësisë, delegacioni i BE vëren se parimi kryesor duhet të jetë pakthyeshmëria e reformës në drejtësi të vitit 2016.

Delegacioni i BE thekson se, “është me rëndësi jetike që procesi i propozuar parlamentar të jetë i bazuar në prova, transparent, të gëzojë mbështetje të fortë ndërpartiake dhe të mbështetet në një konsultim gjithëpërfshirës dhe kuptimplotë me të gjitha institucionet dhe palët e interesuara, përfshirë edhe shoqërinë civile”.

“Në kuadër të procesit të anëtarësimit të Shqipërisë në BE, BE-ja po ofron ndërkaq asistencë të madhe për Shqipërinë në fushat e qeverisjes së mirë, sundimit të ligjit dhe antikorrupsionit, si dhe është e gatshme të rrisë mbështetjen e vet, sipas rastit”, përfundon reagimi i Delegacionit të BE për ATSH-në.