Pse kjo qeveri, duhet të largohet

Tani të njëjtët njerëz na servirin vepra gjigande, që kërkojnë që ne të bëjmë investime të papërballueshme nga xhepat tanë. Vetë kryeministri para disa muajsh deklaroi se para disa muajsh ka nënshkruar një marrëveshje me qeverinë italiane për ndërtimin e një centrali bërthamor. Dje qeveria italiane nënshkroi një marrëveshje për një central bërthamor me Rusinë, pra kjo ishte vetëm gënjeshtra e radhës

Nga Rudina Seseri

Deputete e PS

Ne jemi mbledhur të gjithë sot këtu në mbështetje të kolegëve deputetëve grevistë dhe qytetarëve që janë brenda në këtë grevë, për të njohur të drejtën tonë të votës së lirë.

Jo vetëm për të njohur të drejtën tonë të votës së lirë, por edhe për shkak se ekonomia shqiptare po keq menaxhohet, pasuritë po shpërdorohen, buxheti i shtetit po përvetësohet nga korrupsioni. Ndërkohë qeveria mban një qëndrim të papërgjegjshëm ndaj krizës ekonomike, varfërisë dhe papunësisë së të gjithë shqiptarëve.

Nuk është harruar ende rasti i turpshëm i piramidave që e kanë njollosur keq vendin. Që në çdo vend tjetër perëndimor, do të kishin nxjerr para ligjit jo vetëm nëpunësit e të gjitha niveleve të përlyer në piramida, por edhe qeveritarët, jo më të guxonin të ishin ata që menaxhonin sot vendin.

Vetë kryeministri ka deklaruar se qeveria do të investojë në ndërtimin e boshtit të jugut, ndërkohë që para disa ditësh i njëjti kryeministër deklaroi se qeveria do të investojë në hekurudhën e vendit. Ndërsa para dy ditësh ai nënshkroi me Italinë dhe me homologët e Ballkanit, një marrëveshje për ndërtimin e korridorit të 8-të, që është perndikular me boshtin e jugut, pra në konflikt me të.

Të gjitha këto janë mashtrime, janë pa asnjë studim, janë pas asnjë ide për koston. Dhe si rezultat vendi më i varfër i Evropës paguan sot 15 milion euro për çdo kilometër rrugë që ndërtojmë.

Sindromi i gjingandizmit është një sindrom i pastër populist, diktatorial. Qeveritarët deklarojnë se Shqipëria do të bëhet një superfuqi energjetike, superfuqi çimentoje, superfuqi turizmi, pa asgjë të studiuar, të shkruar pas asnjë llogaritje, pa dëgjuar asnjë mendim nga ekspertët. Ndërkohë që një TEC me qymyr në Durrës apo në Vlorë, një portë nafte përsëri në Vlorë, dy fabrika çimentoje në Krujë dhe në Fushkrujë, apo dhe një në Shkodër, janë të mjaftueshme që në Shqipëri të mos shkel asnjë këmbë turisti.

Këto gjingantizma servilen kur ekonomia shqiptare është në gjendje të mjerueshme. Ku shqiptarët përballen me një mos zhvillim industrial, me një bujqësi të pazhvilluar dhe të neglizhuar thellësisht nga politikat publike, me biznese të frenuara e gati të falimentuara, me eksporte të papërfillshme, me keq menaxhim e përvetësim të fondeve publike.

Të nderuar bashkëqytetar, vendi ynë i ka të gjitha mundësitë për të njohur votën e lirë dhe për të qenë një vend me ekonomi të zhvilluar. Me kusht që të menaxhohet mirë, me njerëz të aftë, me misionarë të ekonomisë së tregut, që nuk janë peng e të kaluarës së tyre komuniste. Qeveria e sotme ka dëshmuar që është e pa aftë në përmbushjen e këtyre kritereve, dhe vazhdon të besoj si dikur gjatë periudhës komuniste, se gjithë bota duhet të marrë shembull prej asaj, duke harruar se këtë përrallë nuk e beson më askush, as brenda e sa jashtë vendit.

Prandaj kjo qeveri e paaftë, duhet të largohet.

(*) Pikëpamjet e shprehura, janë qëndrime personale të autores

Më shumë nga Analiza