Punimet në shesh, trafik në Tiranë

Situatë e rënduar e trafikut, bori që bien si sirena alarmi, qytetarë dhe automjete që shpesh nuk respektojnë shenjat e qarkullimit rrugor. Kjo ka qenë gjendja e disa prej segmeteve kryesore rrugore në Tiranë, në paraditen e të shtunës. Kamera e "Ora News", ka vëzhguar gjendjen e trafikut në disa rrugë në kryeqytet, dhe në të gjitha këto akse, ka qenë e njëjta panoramë e trafikut rrugor.

Drejtuesit e automjeteve, dhe kalimtarët ia hedhin fajin njëri - tjetrit, për mosrespektim të sinjalistikës, por ata shprehen gjithashtu se një rol të rëndësishëm në rëndimin e trafikut kanë dhe punimet për rikonstruksionin e disa rrugëve, veçanërisht ato në sheshin "Skënderbej', të cilat kanë devijuar në disa pjesë lëvizjen e mjeteve rrugore.

Sipas qytetarëve një problem mjaft i rëndësishëm në Tiranë, janë dhe ndotjet akustike, për të cilat Tirana është cilësuar nga agjencitë studimore si një nga qytetet më problematike në vendin tonë dhe në Evropë.