“Qeveria shqiptare i ka respektuar liritë e komuniteteve fetare”

Departamenti Amerikan i Shtetit publikon raportin për lirinë fetare

Departamenti Amerikan i Shtetit ka publikuar raportin vjetor për tolerancën fetare, përfshirë edhe Shqipërinë. Raporti i DASH thekson  se liria fetare në Shqipëri mbrohet me Kushtetutë dhe ligj dhe se qeveria përgjithësisht i ka respektuar liritë e komuniteteve fetare. “Qeveria vazhdoi të trajtonte pretendimet nga grupet fetare lidhur me kthimin ose kompensimin e pronave të konfiskuara gjatë kohës së komunizmit; megjithatë, shumë pretendime pronësore mbetën të pazgjidhura. Pas arritjes së marrëveshjeve dypalëshe në vitin 2008 midis qeverisë dhe komuniteteve myslimane, ortodokse, dhe bektashiane, qeveria udhëzoi Agjencinë Shtetërore për Kthimin dhe Kompensimin e Pronave që t’i jepte përparësi pronave të zotëruara nga grupet fetare. Megjithatë, sfidat administrative dhe ligjore të lidhura me pretendimet pronësore në përgjithësi e bënin kthimin e pronave të vështirë për individët dhe organizatat, përfshi grupet fetare, dhe përparimi ishte i ngadaltë. Për shembull, procedurat e ngecura administrative vazhduan ta pengonin komunitetin bektashian nga rimarrja e pronave në Ksamil, prona të cilat një gjykatë ia kishte kthyer në vitin 2009”, thekson raporti. Më pas në raport i jep rëndësi regjistrimit të popullsisë dhe përkatësisë fetare duke vlerësuar përgjithshisht censusin. “Sipas regjistrimit të popullsisë të vitit 2011, popullsia përbëhet nga 2.8 milionë banorë. Është e vështirë të vlerësohen përmasat e grupeve fetare sepse afro 20 përqind e të intervistuarve refuzuan t’i përgjigjeshin pyetjeve opsionale të regjistrimit mbi përkatësinë fetare. Një numër udhëheqësish fetarë i sfiduan rezultatet e regjistrimit. Sipas regjistrimit, myslimanët sunitë përbëjnë afro 57 përqind të popullsisë, katolikët romanë 10 përqind, të krishterët ortodoksë (Kisha Ortodokse Autoqefale e Shqipërisë) afro 7 përqind, dhe bektashinjtë (një formë e sufizmit shiit) 2 përqind. Grupe të tjera përfshijnë Bahait, Dëshmitarët e Jehovait, Kishën e Jezu Krishtit të Shenjtorëve të Ditës së Shtatë (mormonët).  Komiteti Shtetëror për Kultet raporton mbi 230 grupe, organizata, fondacione, dhe institucione fetare që kryejnë aktivitetin e tyre në vend”, vijon raporti. Gjithnjë sipas raportit, në Shqipëri nuk ka patur raportime për abuzime apo diskriminim shoqëror bazuar në përkatësinë fetare. Më tej, theksohet se Ambasada e Shteteve të Bashkuara të Amerikës në Tiranë, është angazhuar dhe takuar rregullisht me udhëheqësit fetarë dhe me aktorë të tjerë, për të diskutuar çështje fetare, përfshirë edhe rëndësinë e kthimit dhe kompensimit të tokës. Ambasada, thekson raporti, ka promovuar lirinë fetare, nëpërmjet shtrimit të iftarit, tryezave të rrumbullakëta si dhe nëpërmjet dialogut ndërfetar.