Qeveritarët mohojnë gjithçka

Kryeministri Sali Berisha ka reaguar ashpër ndaj sulmeve të opozitës dhe kryesisht ndaj shkrimit të botuar dje në gazetën amerikane “New York Times”. Shefi i ekzekutivit shqiptar duke iu drejtuar deputetëve socialistë, e ka barazuar të përditshmen amerikane me një letër higjienike. “Mbaji për letër higjienike ato që fabrikon ti me Erionët e tu”, tha Berisha. Berisha ka ripohuar edhe ditën djeshme, se nuk ka pasur asnjëherë dijeni për Gërdecin dhe për çfarë ndodhte atje. Njëkohësisht, ai deklaroi se kurrë nuk ka pasur ndonjë takim me pronarin e kompanisë shqiptare që merrej me demontimin e armatimeve, Mihal Delijorgji. Madje, ai tha se tjetër kujt mund t’i djegë Delijorgji. Gjatë debatit me opozitën, Berisha tha se, nëse opozita do që t’i përmbahet parlamentarizmit, le të ushtrojë të drejtën e mocionit ndaj kryeministrit për ngjarjen e 15 marsit. “Por, nëse mendoni se mund të shkruhet një rregullore tjetër, kjo është pjesë e atij skenari që kërkon ta shfrytëzojë një fatkeqësi të tmerrshme për qëllime ekstreme politike”, tha Berisha. Kryeministri tha se opozita mund të marrë gjithë dokumentacionin që lidhet me shitblerjen e armëve. “Dokumente autentike se kompania e ngarkuar për blerjen e fishekëve dhe municioneve për në Afganistan, ka fituar një tender të organizuar nga Pentagoni, për një sasi municionesh për ushtrinë afgane”, tha kreu i qeverisë. Ai lexoi në Kuvend një kopje të Komandës së Bashkuar për Furnizim. Sipas këtij dokumenti, certifikohet se në datën 23 mars 2007 është porositur te kompania “AEY” për artikullin e mëposhtëm. “Në këto terma dhe rrethana të kontratës së shitjes së materialeve ushtarake, ushtria amerikane në emër të Ministrisë së Mbrojtjes së Afganistanit, certifikon se artikujt e mëposhtëm në sasinë e treguar, janë për përdorim ekskluziv të forcave të armatosura të Afganistanit dhe nuk do të shiten, rieksportohen apo disponohen nga asnjë palë tjetër, pa pajtimin e qeverisë shqiptare”, tha Berisha, duke cituar kontratën në fjalë.

“Të gjitha deklarimet e bëra nga personat, që janë cituar në artikullin e djeshëm të “New York Times”, janë krejtësisht të trilluara dhe të paqena”. Ky ishte reagimi i djeshëm i Ministrisë së Mbrojtjes në lidhje me shkrimin e djeshëm me titull “Furnizuesi po investigohet mbi armët e vjetra për afganët”, të botuar në gazetën prestigjioze. Nëpërmjet në njoftimi për shtyp të dalë dje nga Ministria e Mbrojtjes, sqarohet se të gjithë deklarimet e bëra nga personat që janë cituar në këtë artikull, janë krejtësisht të trilluara dhe të paqena. “Ministria e Mbrojtjes sqaron edhe njëherë se kontrata e Ministrisë së Mbrojtjes me Pentagonin dhe kompaninë “AEY” është e ligjshme. Kjo kontratë është e miratuar nga Departamenti Amerikan i Mbrojtjes”. Sipas po të njëjtit reagim zyrtar. mësohet se kjo kontratë është verifikuar edhe nga shërbimet inteligjente ushtarake dhe nga shërbimet inteligjente të vendeve partnere. “Sikundër jeni informuar, pasi Kosta Trebicka ka vënë në dijeni Ministrinë e Mbrojtjes për disa shqetësime të tij, ministri u ka kërkuar menjëherë autoriteteve të ambasadës amerikane në Tiranë të bëjnë verifikimet përkatëse. Kjo kontratë ka rezultuar e vlefshme pas verifikimeve nga ana e autoriteteve të ambasadës amerikane në Tiranë, gjë e cila është e konfirmuar tashmë”. Zyrtarisht, nëpërmjet njoftimit të djeshëm, Ministria e Mbrojtjes pohoi se gjithashtu është verifikuar edhe “Dokumenti i Plotfuqisë” që kompania “AEY” i ka lëshuar “Evdin Ltd”. Nga të gjithë verifikimet ka rezultuar që kontrata dhe dokumenti i Plotfuqisë janë autentike dhe në përputhje të plotë me legjislacionet respektive. Në fund, reagimi i Ministrisë sonë të Mbrojtjes mbyllet duke deklaruar se raportet mes kompanisë “AEY” dhe “Evdin Ltd” janë pjesë e marrëdhënieve mes këtyre dy kompanive, pjesë e investigimeve amerikane dhe jashtë sferës së Ministrisë së Mbrojtjes së Shqipërisë. Nderkohe debatet e ashpra ne Kuvend dje kane pasur per kryefjale pikerisht shuplaken e rende te Nju Jork Tajms. Kryeministri Berisha i habiti te gjithe kur kerkesave te opozites per te dhene sqarime rreth artikullit ne fjale iu pergjigj duke u keshilluar atyre qe ta perdorin si "leter higjienike" gazeten prestigjoze ku ngriheshin aludime te hapura per implikimin e tij dhe te djalit te tij ne aktivitete mafioze.

Pentagoni pezullon kontratën me “AEY Ltd”
Po dje, pas botimit të artikullit me titull “Furnizuesi po investigohet mbi armët e vjetra për afganët”, reagoi edhe Pentagoni. Sipas zyrës së shtypit të Departamentit të Mbrojtjes, kjo e fundit ka pezulluar aktivitetin e kompanisë “AEY Ltd”, kompani e kontraktuar nga qeveria shqiptare për tregtinë e fishekëve drejt Afganistanit. Zëdhënësi i Pentagonit bëri me dije, se pezullimi është bërë, pasi kompania ka shkelur ligjet amerikane, ndërsa thekson se kjo kompani është nën hetim kriminal. Gjatë kësaj deklarate zyrtare, Pentagoni thekson se kompania “AEY. Ltd” deklaronte se i merrte fishekët nga Hungaria, ndërsa merrte fishekë kinezë në Shqipëri dhe i shiste në Afganistan. Zëdhënësi i Pentagonit bëri gjithashtu me dije, se një pjesë e fishekëve nuk janë përdorur, për shkak të paketimit të dobët. Po për të njëjtit burim zyrtar të informacionit, Pentagoni kishte paralajmëruar pronarin e “AEY”, Efraim Diverolin, për pezullim të aktivitetit. Në një letër të shkruar të martën, ushtria i ka bërë të ditur pronarit të kompanisë, Efraim Diveroli, se hetimi mund të çonte në përfundimin, se “AEY. Ltd” do të përjashtohej nga çdo lloj bashkëpunimi me qeverinë e SHBA-ve.