Rama: Basha mund të bëhet president me votat e PS, aq sa Berisha mund të fitojë çmimin Oscar

Kryeministri Edi Rama, ka mbyllur çdo mundësi që kreu i dorëhequr i PD-së, Lulzim Basha, të mund të bëhet President, sa kohë që PS ka mazhorancën. Zoti Rama, gjatë një deklarate për shtyp në përfundim të mbledhjes së Asamblesë së PS, u shpreh se Basha mund të zgjidhet president, aq sa ish-kryeministri Sali Berisha mund të fitojë çmimin Oscar.

“Basha mund të bëhet president i Republikës me votat e kësaj shumice aq sa Berisha mund të fitojë çmimin Oscar”, tha Rama.

Ndonëse ka theksuar se maxhoranca i ka votat për ta zgjedhur edhe vetëm Presidentin e ri, zoti Rama theksoi se negociatat do të bëhen me çdo individ.

“Sapo kemi mbaruar një mbledhje të Asamblesë Kombëtare në vigjilje të Kongresit të PS-së, i cili do të jetë një kongres në një kontekst të jashtëzakonshëm, për shkak të kohës që jetojmë, me një format të ri, në funksion të një hapjeje të gjerë, të një adresimi të atyre që janë çështjet më të rëndësishme të këtij momenti të vështirë. Sigurisht që do të kemi jo vetëm ata që do të flasin në emër të lidershipit të partisë, por do të kemi të gjitha disponimin dhe po bëjmë atë që duhet për të pasur të ftuar që të përfshihen në debatet tona, në kërkim të një gjallërimi të debatit jo vetëm brenda familjes sonë politike, por të rigjallërimit të një debati të shëndetshëm në funksion të përmirësimit të mëtejshëm të vetvetes sepse kundërshtarët janë bërë një problem që të paktën për momentin nuk ekziston”, theksoi Rama.