Rama: Partia Demokratike që ishte e jona, Saliu thotë është e imja

Kryetari i Partisë Socialiste Edi Rama, në një takim me të rinjtë te Akademia e Arteve është shprehur se ishte ngjizur një frymë antiparti në Dhjetor të vitit 1990. Rama ka theksuar se jetonin në sheshin e burgut. “Kështu e quanim Shqipërinë atëherë”, tha ai.
 

Rama ka sulmuar në distancë kryetarin e mazhorancës Sali Berisha duke vlerësuar se ai ka monopolizuar Partinë Demokratike duke u shprehur se nuk ka gjë më interesante në histori, për atë që ishte partia e tij, Saliu thotë është imja.
“Ajo (Partia Demokratike) që ishte e jona, Saliu thotë e është e imja”.

Kurse duke u kthyer në kohë ai tha se në fillim të viteve ’90, “Partia Demokratike nuk e goditi që në fillim Enver Hoxhën dhe as nuk liroi që në fillim të burgosurit politikë.

“Në Institutin e Lartë të Arteve u akumulua një revoltë e madhe. Në këtë akademi, në këtë skenë, u godit për herë të parë diktatori dhe foli një i burgosur politik”, deklaroi Rama.
Kryesocialisti duke kujtuar atë periudhë tha se “refleksionet ishin hapësira e individit dhe shtoi: “Mbledhja e parë Refleksionit u bë pa energji elektrike, ishte periudhë kur mbizotëronte frika.Momenti kur u tha që të hiqet figura e Enver Hoxhës ishte momenti më i rëndësishëm. Këtu u nënshkrua peticioni i parë drejtuar Ramiz Alisë, në atë kohë kryetar i Presidiumit të Kuvendit Popullor dhe Sekretar i Parë i Komitetit Qendror të Partisë së Punës së Shqipërisë, post që e “trashëgoi” pas vdekjes së Enver Hoxhës. Në peticion kërkohej goditja e figurës së Enver Hoxhës por letra-peticion nuk u botua nga shtypi opozitar i kohës”.

Në mbyllje Rama tha se “unë kurrë nuk do të jap këshilla për të rinjtë. Gjithsesi nëse thoni se nuk merreni me politikë, ta dini se merret ajo me ju”.