Reali gjithmonë respekton kundërshtarët

Ndihmëstrajneri i Real Madridit, Aitor Karanka insistoi pas fitores 2-1 ndaj Granadas të shtunën në La Liga se skuadra gjithmonë respekton kundërshtarët e tij.

Të freskët nga shpallja kampion në ligë javën e kaluar, Reali fillimisht vuajti kundër Granadas dhe ishte në disavantazh prej një goli por në fund arriti të fitojë. Në deklaratat e tij pas ndeshjes, Karanka refuzoi sugjerimet se Reali kishte nënçmuar kundërshtarin.

“Ne e treguam se kemi respekt për të gjithë rivalët tanë në garë. Barazimi do të ishte rezultati më i drejtë por këto gjëra ndodhin në futboll. I uroj fat Granadas, por ata e paguan çmimin që nuk e përfunduan ndeshjen më herët. Ne ende kemi objektiva këtë sezon, të ndihmojmë Ronaldon të fitojë çmimin e golashënuesit më të mirë dhe të arrijmë në 100 pikë, por gjithmonë respektojmë kundërshtarët”, deklaroi ai.

Reali do të grumbullojë 100 pikë nëse fiton ndeshjen e xhiros së fundit kundër Real Mallorcas të shtunën.