Regjistrimi në PER, Celibashi: Riaplikoni pa kufizim deri në 4 mars, asistencë nga punonjësit e KQZ-së

TIRANË, 27 shkurt/ATSH/ Komisioneri Shtetëror i Zgjedhjeve, Ilirjan Celibashi informoi sot zgjedhësit nga jashtë të cilëve u është refuzuar kërkesa për t’u regjistruar në Platformën Elektronike të Regjistrimit (PER), se mund të riaplikojnë pa kufizim në numër deri në datën 4 mars.

Përmes një videomesazhi informues, Celibashi këshillon që përpara se të riaplikojnë, të kontaktojnë me KQZ-në për t’i asistuar një punonjës i këtij institucioni gjatë procesit të riaplikimit.

“Për këtë qëllim ata mund të rezervojnë një telefonatë me KQZ-në nëpërmjet këtij linku: www.kqz.gov.al/rezervo2”, bëri të ditur Celibashi.

Procesi për regjistrimin në Platformën Elektronike të Zgjedhësve (PER) ka filluar në 11 janar dhe do të zgjasë deri në datën 4 mars.

Në Platformën Elektronike të Regjistrimit (PER) që nga 11 janari deri sot kanë bërë kërkesë për t’u regjistruar për të marrë pjesë në zgjedhjet parlamentare të 11 majit, 239 992 shtetas shqiptarë.

/m.m/r.e/