Rezarta Shkurta, klip me Milicevic

 

Rezarta Shkurta premton se do të na mahnisë me klipin e ri që është duke përfunduar, ndërsa po përgatit vetë veshjet. Do të jetë klipi më i bukur, që ka bërë ndonjëherë dhe për këtë po bashkëpunon me kompozitorin Genti Lako, dhe regjisorin e njohur maqedonas Dejan Milicevic, edhe pse ende nuk është vendosur nëse do të jetë një këngë në bashkëpunim me tjetër këngëtar, apo jo. Ajo nisi punën për realizimin e klipit në fillim të shtatorit, sapo ka lënë një periudhë koncertesh të shumta. Ky bashkëpunim me dy emra të njohur, është shumë optimist për Rezartën, e cila kishte pohuar vazhdimisht në shtyp se po përgatitej për një klip ndryshe. Regjisori Milicevic është po ashtu fotograf artistik, pasi ka fotografuar mjaft modele, disa foto prej të cilave u përdorën dhe në koleksionin e Joni Peçit. Ai po ashtu ka realizuar fotot artistike nudo të këngëtares serbe të turbo-folkut, Svetlana në revistën “Playboy”. E në rrethin e artistëve nga Shqipëria, Kosova e Maqedonia ai është shumë i njohur pasi ka realizuar klipet si: “Kriza” të Berkanit, “Prapë se prapë”  të Gilit dhe Sinan Vllasaliut, “Another World” të Nora Istrefit,  “Ah, moj dashuria ime” të Pirro Çakos, apo “Dashuri Mistike” të Tamara Todevskës dhe Adrian Gaxhës.