Rikonfirmohet mazhoranca, me miratimin e ministrave të rinj; Noka, Tavo e Panariti

Miratohet me 72 vota pro emërimi i Flamur Nokës si ministër i Brendshëm, Edmond Panaritit si ministër i Punëve të Jashtme, Edmond Haxhinastos si Ministër i Ekonomisë dhe Vangjel Tavos si ministër i Shëndetësisë

Kuvendi shprehu dje votëbesimin për ndryshimet në qeverinë “Berisha”. Sipas propozimeve të Kryeministrit Berisha, të dekretuara nga Presidenti i Republikës Bamir Topi, u realizuan me 71 votat e deputetëve të mazhorancës në këtë seancë plenare shkarkimet e ministrave dhe emërimet e reja në ekzekutiv.
Votimi i parë ishte shkarkimi zyrtarisht nga detyra e ministrit të Brendshëm e Presidentit të zgjedhur me 11 qershor Bujar Nishani, i cili po përgatit kabinetin për t’u betuar si kryetar shteti më 24 korrik, ditë kur zyrtarisht nis mandatin e tij 5 vjeçar.
Në postin e rëndësishëm të ministrit të Brendshëm u emërua demokrati tjetër Flamur Noka, aktualisht deputet dhe sekretar organizativ i PD-së.
Nga radhët e LSI-së, Kuvendi votoi daljen nga qeveria të ministrit të Shëndetësisë Petrit Vasili, i cili zëvendësohet me ish-nënkryetarin e Kuvendit Vangjel Tavo. U shkarkua gjithashtu ministri i Ekonomisë Nasip Naço, i cili i la vendin Edmond Haxhinastos, teksa ky i fundit zëvendësohet me Edmond Panaritin
Për Nasip Naçon nuk është e re detyra që mori pas largimit nga qeveria.
Më 23 qershor kryeministri Sali Berisha emëroi deputetin demokrat Flamur Noka në postin e ministrit të Brendshëm, post i mbetur vakant pas zgjedhjes së Bujar Nishanit si president i ri i vendit.
Po ashtu, përveç emrit të Flamur Nokës, Kryeministri i dërgoi presidentit të Republikës për dekretim dhe emrat e tre ministrave të tjerë të propozuar më 22 qershor nga Lëvizja Socialiste për Integrim. Ministër i Jashtëm i vendit u propozua Edmond Panariti, nënkryetar aktual i Bashkisë së Tiranës, ndërsa ministri aktual Edmond Haxhinasto kaloi te ministria e Ekonomisë.
Në ministrinë e Shëndetësisë LSI propozoi Vangjel Tavon, i cili zëvendësoi Petrit Vasilin, i rikthyer për të mbuluar funksionet partiake.
Ndërsa Kuvendi ka hyrë në muajin e fundit të punës së këtij sesioni, ka përmbyllur zgjedhjen e presidentit të republikës dhe ndryshimet në qeveri, por sfidat për të nuk kanë përfunduar, një pjesë e të cilave e kanë të domosdoshme votën e opozitës.
Mazhoranca dhe opozita miratuan më herët me konsesus kalendarin trejavor të punimeve në konferencën e kryetarëve të grupeve parlamentare, por pritet për t’u parë se sa ky konsensus do të përkthehet në reforma dhe përmbushje të plotë të kalendarit të sapo miratuar.