Ristani: Reforma, komisionet të pavarura nga politika

Reforma zgjedhore duhet të fillojë së pari, sa i përket përbërjes së komisioneve të të gjitha niveleve. Kryetari aktual i Komisionit Qendror të Zgjedhjeve, Arben Ristani ka thënë në studion e “Ora News”, se megjithëse partitë politike, e kanë hartuar Kodin Zgjedhor, sërish akuzojnë për institucionet si të varura politikisht. Në këtë mënyrë, Ristani mendon që për të shmangur situata të tilla, duhet punuar për pavarësinë e këtyre hallkave zgjedhore.
Ndër të tjera, Ristani ka deklaruar se të gjitha vendimet e marra nga KQZ-ja janë në përputhje me ligjin.
Duke u ndalur tek periudha parazgjedhore, kreu i KQZ-së theksoi se kjo periudhë është karakterizuar nga tensioni politik. “Procesi organizativ është karakterizuar nga një tension politik, që pengon zhvillimin e zgjedhjeve. Do e karakterizoja periudhën parazgjedhore, periudhë të shoqëruar me tension të panevojshëm politik. Ne arritëm të krijonim infrastrukturën zgjedhore dhe të kishim ditë zgjedhjesh, pothuajse të mirë”, vijoi kreu i KQZ-së.
Përsa i përket procesit të numërimit, Ristani deklaroi se ky proces ishte i mirë, edhe pse me difektet që dihen, por që nuk u bllokua siç ka ndodhur më parë. “Kishte 2 parakushte që na penguan, tensioni poliitk dhe mungesa e anëtarëve. U detyruam të punomin me aktet që KQZ-ja i kishte nxjerrë në 2009. Jam i bindur që zgjidhja që dha KQZ-ja ishte ligjore, e paanshme dhe që i rezistoi gjyqësorit”, nënvizoi ndër të tjera ai.
Akuzat e ngrituar nga opozita ndaj anëtarëve të KQZ-së, Ristani i cilësoi të pabaza.
“Akuzat kanë qenë të pabaza. KQZ-ja është transparent dhe në sytë e të gjithëve për çdo veprim që kryen dhe për çdo akt që merr. Edhe raportet e ndërkombëtarëve, ato që kanë dalë për 2009 kanë qenë të mira. Kritikat nuk janë për menaxhimin e zgjedhjeve nga KQZ-ja, të paktën kritikat për 2009 kanë qenë për forcat politike, sesi ato konfrontoheshin me procesin zgjedhor. OSBE-ja ka thënë se puna ka qenë e paanshme dhe transparante. Edhe raportet paraprake kanë evidentuar transparencën, nga ana tjetër nuk pres kritika të forta, pavarësisht se raporti nuk ka dalë akoma”, vijoi ai.