Rouçek: Integrimi varet nga zgjidhja e krizës

Zëvendëspresidenti Social Demokrat i PE, apel për politikën shqiptare

Grupi kryesor Progresist në Parlamentin Europian shprehu dje shpresën që qeveria dhe opozita shqiptare të kuptojnë qartë se kapërcimi i mosmarrëveshjeve politike aktuale është vendimtar për progresin e vendit drejt integrimit europian.

Deklarata është bërë nga Libor Rouçek, zëvendëspresidenti Social Demokrat i Parlamentit Europian dhe raporteri ndihmës për përgatitjen e Rezolutës mbi procesin e integrimit në BE të Shqipërisë, i cili nënvizoi faktin se të gjitha palët politike duhet të marrin përsipër përgjegjësitë e tyre dhe të angazhohen në një dialog konstruktiv.

Përndryshe, sipas tij, "ekziston një rrezik serioz që përpjekja e vendit për t'u anëtarësuar në BE të pezullohet". "Ka ardhur koha për të gjetur një zgjidhje për krizën politike aktuale, mbi një bazë që do të mund t'i qëndrojë kohës.

Është përgjegjësia e qeverisë të gjejë pa humbur kohë zgjidhje dhe mënyra për të ecur përpara, çka i nevojiten vendit teksa ecën drejt BE", deklaroi Rouçek.

Ai përshëndeti progresin që është bërë në lidhje me përgatitjet për liberalizimin e vizave dhe i nxisim autoritetet që të punojnë shumë për të përmbushur të gjitha kriteret deri në fund të 2010.

Zëvendëspresidenti Social Demokrat i Parlamentit Euvropian tha gjithashtu se po presin që në Shqipëri palët politike të gjejnë mundësinë për dialog. "Kjo, së bashku me votën e mbi raportin në tërësinë e tij, do të ndihmojë Shqipërinë për të ecur me efikasitet drejt integrimit europian", theksoi zyrtari i lartë i PE.

Sipas tij, progresi i secilit vend drejt Bashkimit Europian varet nga përpjekjet e tij për t'ju përmbajtur kritereve të Kopenhagenit dhe kushteve të Procesit të Stabilizim Asociimit.