Rreziku nga leishmanioza, specialistët në Korçë bëjnë apel për masa parandaluese te kafshët shoqëruese

Rritja e temperaturave gjatë verës krijon kushte të favorshme për zhvillimin e vektorëve transmetues të sëmundjeve, si mushkonjat sandflies, të cilat mund të transmetojnë sëmundje të rrezikshme si leishmanioza, e cila është e përhapur te qentë në qarkun e Korçës dhe mund të kalojë edhe tek njeriu. Specialistët theksojnë se kontrolli i vektorëve dhe përdorimi i preparateve mbrojtëse janë masat më të rëndësishme për ndërprerjen e ciklit të transmetimit të sëmundjes.

Veterineri Kristi Morava ndan këshillat dhe thotë se kujdesi i vazhdueshëm ndaj kafshëve shoqëruese, kontrollet periodike veterinare dhe përdorimi i preparateve mbrojtëse ndihmojnë në uljen e rrezikut të infektimit edhe për njerëzit. Specialistët u bëjnë thirrje pronarëve të mos neglizhojnë masat parandaluese, veçanërisht gjatë sezonit të verës, kur rreziku i përhapjes së sëmundjes është më i lartë.

Gazetare: E. Fili