Rrini të qetë

Sekretari Gjeneral i NATO’s, Anders Fogh Rasmussen, apeloi për qetësi gjatë zgjedhjeve serbe këtë të diel. Ai ka kërkuar nga të gjitha palët që të përmbahen gjatë procesit të votimeve, përndryshe KFOR’i i ka të gjitha instrumentet dhe mandatin për të mbajtur situatën nën kontroll. Ambasadori amerikan, Christopher Dell pohoi se marrëveshja me OSBE’në për mbajtjen e zgjedhjeve serbe nuk shkel sovranitetin e Kosovës.

Në prag të zgjedhjeve parlamentare dhe presidenciale serbe në Kosovë,

KFOR’i ka ndërmarrë të gjitha masat që të jetë i gatshëm për çfarëdo

tensionimi të mundshëm të situatës.

Anders Fogh Rasmussen, Sekretari Gjeneral i NATO’s, u ka bërë thirrje

liderëve të Serbisë dhe Kosovës që të përmbahen nga deklaratat, por edhe

veprimet unilaterale që mund të rrisin tensionet në këtë situatë delikate.

“Inkurajoj fuqishëm të gjithë liderët dhe të gjitha komunitetet që të

tregojnë përmbajtje gjatë procesit të votimit. Në këtë periudhë kritike

është e rëndësishme që të shmangen çfarëdo vepra dhe deklarata unilaterale,

të cilat mund të rrisin tensionet”, thuhet në deklaratën e Sekretarit të

NATO’s.

Megjithatë, Rasmussen ka paralajmëruar se KFOR’i është plotësisht i

përgatitur dhe ka mandatin dhe të gjitha instrumentet që të veprojë në çdo

moment për të mbajtur qetësi dhe rend, në rast të çfarëdo incidenti që

mund të rrezikojë sigurinë dhe stabilitetin në Kosovë.

Ai ka rikujtuar se misioni i KFOR’it është të ruajë një ambient të sigurt

për të gjithë njerëzit e Kosovës në mënyrë të paanshme, ashtu siç ka bërë

për një dekadë.

“Unë kam besim të plotë në profesionalizmin dhe gjykimin e Komandantit të

KFOR’it për të përdorur të gjitha mjetet brenda mandatit të tij dhe të

gjitha instrumentet të dispozicion, duke përfshirë Batalionin e Dytë të

Forcës Operacionale Rezervë, që tashmë është dislokuar në Kosovë”, ka

thënë Rasmussen.

Sekretari i NATO’s ka përshëndetur marrëveshjen e arritur me OSBE’në për

mundësimin e zgjedhjeve parlamentare dhe presidenciale serbe në Kosovë.

Për më shumë, ai u ka bërë thirrje Kosovës dhe Serbisë që të bashkëpunojnë

me faktorin ndërkombëtar. Sipas tij, e ardhmja e tërë rajonit është

integrimi në hapësirën euro-atlantike.

“Dhe për këtë arsye duhet të bëjmë gjithçka që është e mundur për të

shmangur çfarëdo dëmtimi të progresit të rajonit drejt këtij qëllimi”, ka

vlerësuar ai.

Lejimin e mbajtjes së zgjedhjeve parlamentare dhe presidenciale serbe në

Kosovë e ka përshëndetur edhe Ambasadori amerikan në Kosovë, Christopher

Dell. Sipas tij, kjo paraqet një shembull të mirë të bashkëpunimit mes dy

vendeve fqinje, por se ende është herët të thuhet nëse këto zgjedhje do të

shërbejnë për përmirësimin e raporteve mes dy vendeve.

"Gatishmëria e Qeverisë së Kosovës për t’ia lejuar OSBE-së që të lehtësojë

votimet në zgjedhjet parlamentare dhe presidenciale të Serbisë nënvizon

synimin për raporte të mira fqinjësore dhe përkushtimin e saj për

standardet evropiane", ka thënë Ambasadori amerikan.

Duke folur për paralajmërimin e disa serbëve lokalë të pjesës veriore të

Kosovës se më 6 maj, karshi zgjedhjeve parlamentare dhe serbe, të mbahen

edhe zgjedhjet lokale, Dell ka thënë se kjo nismë, edhe nëse ndërmerret,

nuk ka kurrfarë efekti ligjor.

“Ato janë po aq të rëndësishme sa referendumi që ata e patën mbajtur në

shkurt, e të cilin e patën injoruar të gjithë. UNMIK-u, Beogradi dhe e

tërë Bashkësia Ndërkombëtare kanë deklaruar se nuk i njohin si legjitime

këto zgjedhje".