Ruli: Ligj i ri, kush vjedh energji, do të shkojë në burg

Vjedhja e energjisë elektrike dhe ndëshkimi do të jenë tashmë vepër penale, e cila do të ndëshkohet nëpërmjet një ligji të veçantë të hartuar nga Ministria e Ekonomisë. Sipas ministrit shqiptar të Ekonomisë, nevoja e këtij ligji, i cili parashikon burg për abuzuesit, ka ardhur për të ulur vjedhjet në rrjet, ndërkaq, për sa i përket privatizimit të OSSH, Ruli tha, se për vetë situatën, në të cilën është gjendur si kompania energjitike, ashtu dhe qeveria, privatizimi merr një vështirësi dhe rëndësi edhe më të madhe. Ministri Ruli e cilësoi privatizimin e shpërndarjes së energjisë më strategjikun e zhvilluar ndonjëherë në vend dhe ai tha para përfaqësuesve të kompanive që janë kualifikuar si blerës të mundshëm të këtij sektori se qeveria shqiptare po kërkon një partner dhe jo thjesht një blerës. Qeveria vetë do të jetë partner tha ministri dhe jo thjesht shitës.

“Në këtë aspekt, ndihma dhe asistenca e qeverisë do të jetë strategjike, pasi qeveria ka interes të shohë një sistem energjitik sa më eficient dhe për këtë arsye do t'i ofrojë investitorit gjithçka për të realizuar këtë eficiencë”, - tha ministri Ruli, duke nënvizuar se “është bërë e qartë se qeveria do të vazhdojë politikat e ndërmarra në mbrojtje të kategorive më të varfra dhe më në nevojë të konsumatorëve, praktikë e cila po aplikohet prej më se dy vjetësh dhe do të vazhdojë të aplikohet edhe në të ardhmen”. Ministri i Ekonomisë tha se në planin paraprak të qeverisë, ana teknike merr një rëndësi të madhe. “Rëndësia e aspekteve teknike lidhet me faktin se cili do të jetë investitori i zgjedhur dhe sa do të angazhohet ai me një plan konkret investimesh ambicioze, në mënyrë që në krye të një periudhe trevjeçare ne të kemi një sistem të shpërndarjes të modernizuar”, - tha Ruli. Në qershor të këtij viti, Këshilli i Ministrave vendosi që 76 për qind e paketës shtetërore të aksioneve të kapitalit të Operatorit të Sistemit të Shpërndarjes (OSSH) t'iu ofrohet investitorëve strategjikë. Në garë për privatizimin e OSSH janë kompanitë EVN, CEZ, ENEL dhe “Stetmarker Energy”, të cilat në fillim të muajit shtator, do të paraqesin në ministri ofertat e tyre. Ligji i ri që do të dalë për vjedhjet e energjisë dhe masat e ashpra që ai parashikon synojnë që jo thjesht të ndëshkojnë këtë vjedhje të pronës publike, por edhe t’ia lehtësojnë punën kompanisë blerëse, me qëllim që humbjet të jenë sa më të vogla dhe kompania të mos synojë të rrisë çmimin e energjisë elektrike. Gjithashtu, në kontratën e privatizimit do të ketë një klauzolë që detyron qeverinë shqiptare të furnizojë me energji vendin, në rast të krizave të mëdha energjitike.