Ruli: “Rama e nisi zyrtarisht fushatën elektorale duke gënjyer”

Reagon ministri i Bujqësisë, Genc Ruli pas akuzave të kreut të PS

Ministri i Bujqësisë, Genc Ruli reagoi pas deklaratave të kreut të PS-së, Edi Rama duke theksuar se, “Edi Rama e nisi sot zyrtarisht fushatën elektorale duke gënjyer”. Në rrjetin social “Facebook”, Ruli shprehet se “ai tha sot se në Shqipëri, nuk ka asnjë shkollë profesionale që përgatit specialistë të tokës. E vërteta është se në Shqipëri ka 11 shkolla profesionale që përgatisin specialist të zotë për çështjet e tokës”. Sipas tij, “irracional si gjithnjë, Rama nuk zhgënjeu as ditën zyrtare të nisjes së fushatës. Ai shpiku dhe sajoi nga salloni i tij mavi, dhe i serviri publikut dokrrat e radhës”. “Specialistë për tokën sot përgatiten në shkollën e mesme profesionale në Bushat; shkollën e mesme veterinare Shkodër, në shkollën e mesme profesionale në Lezhë, në Peshkopi, në Golem, në Kamëz, në Lushnje, Fier, Cërrik, Berat, në shkollën e mesme profesionale në Korçë, Vlorë dhe në shkollën e mesme profesionale në Gjirokastër”, nënvizon ministri. Ai bën të ditur se,  “aktualisht, janë 4 mijë studente në këto shkolla profesionale, që do të jenë nesër specialiste të tokës. 3 nga këto shkolla, e Peshkopisë e Vlorës dhe e Gjirokastrës janë hapur gjatë këtyre viteve”. “Partia Demokratike do të zgjerojë edhe më shumë arsimin profesional në Shqipëri, dhe do të modernizojë shkollat ekzistuese. Ne kemi specialistët e duhur në çdo fushë zhvillimi. Për fat të keq, kemi specialist edhe në fushën e sajimit dhe gënjeshtrave, dhe ky është z.Edi Rama. Por shqiptarët dinë t’i tregojnë vendin gënjeshtarëve dhe këtë do ta bëjnë me 23 qershor”, përfundon Ruli.