Rusi, rrëzohet avioni, vdesin 36 persona

Një avion rus është rrëzuar këtë të mërkurë në qytetin Jarosllav, rreth 200 km larg Moskës. Policia bëri të ditur se 36 nga 37 pasagjerët e avionit kanë mbetur të vdekur, ndërsa një person tjetër nuk është gjetur ende. Në avion, udhëtonin pjesa më e madhe e skuadrës së hokejit “Lokomotiva”.

Forcat ajrore bënë me dije se avioni i tipit Yak-42 u rrëzua dhe u dogj gjatë nisjes në një aeroport në afërsi të qytetit Jarosllav. Avioni u rrëzua 500 metra pas nisjes nga aeroporti, ndërsa pjesët e tij dhe viktimat kanë rënë mbi lumin Vollga
 

Skuadra e “Lokomotivës” po udhëtonte drejt Minskut, kryeqytetit të Bjellorusisë, për ndeshjen kundër Dinomos, për hapjen e sezonit të kampionatit kontinetal të hokejt. Në skuadrat bënin pjesë edhe lojtarë të huaj si nga Suedia, Polonia, Ukraina, Republika Çeke, Gjermania dhe Bjellorusia etj, ndërsa pjestari më i ri i skuadrës ishte 20 vjeçari nga Rusia.
 

Presidenti rus Dimitri Medvedev kërkoi nisjen e menjëhershme të hetimeve, ndërsa shkaqet e këtij aksidenti nuk bëhen ende të ditura. Por, aksidentet ajore në Rusi nuk kanë qenë të rralla, dhe siguria e këtyre udhëtimeve nuk është nga më të lartat, në qershorin e këtij viti një tjetër avion u rrëzua, duke shkaktuar 44 viktima. Medvedev, ka premtuar një vëzhgim më të hollësishëm të kësaj industrie, e cila i përket erës sovjetike.