Rusi, vritet një personalitet mysliman

Një figurë publike myslimane është vrarë në Moskë.  Policia në Moskë tha se trupi i pajetë i Metin Mekhtijev, është gjetur mbrëmë vonë, me plagë të rënda me thikë, afër banesës së tij në qendër të qytetit.

Policia nuk ka dhënë detaje lidhur me motivet e mundshme të vrasjes.

Metin Mekhtijev, 33 vjeçar, shtetas rus me origjinë nga Azerbajxhani, kishte punuar për Qendrën Kulturore Islamike, njëra nga qendrat e tilla më të vjetra në Rusi, që vitin e kaluar ishte mbyllur nga Gjykata Supreme e Rusisë.

I ndjeri Mekhtijev ishte i përfshirë edhe në organizatat e tjera islamike.

Ish kolegët, duke cituar dëshmitarët, thonë se një grup prej pesë njerëzve, përfshirë edhe një femër, “së pari e rrahën e pastaj ia prenë fytin”.

Ata thanë se vrasja i ka shenjat e krimit nga urrejtja nga ana e ultranacionalistëve radikalë.