S’e kemi fituar ende La Ligan

Ylli i Real Madridit, Cristiano Ronaldo insiston se lufta për titull të kamponit në La Liga është ende e hapur. Përfaqësuesi portugez bëri një paraqitje impresionuese të dielën mbrëma, duke i realizuar tre nga katër golat e ‘Los Blancos’, në fitoren 4-2 ndaj Levantes, në ndeshjen e zhvilluar në Santiago Bernabeu.

Ky rezultat e sheh klubin madrilen 10 pikë përpara rivalit Barcelona, që u mposht befasisht nga Osasuna 3-2, një natë më parë.

“Ka ende shumë ndeshje për t’u luajtur, ne duhet të presim. Po luajmë mirë. Kjo ishte një ndeshje e vështirë, ku patëm një nismë negative, por më pas shënuam dhe ndryshuam. Po shkojmë mirë dhe duhet të vazhdojmë kështu”, deklaroi futbollisti portugez pas ndeshjes.

Hat-tricku i shënuar ndaj Levantes e shkëputi Ronaldon edhe më tej ndaj rivalit të tij, Lionel Messi, në listën e golashënuesve më të mirë në kampionatin spanjoll. Tash, ish futbollisti i Manchester Unitedit ka 4 gola më shumë se argjentinasi i Barçës.

“Golat arrijnë si rezultat i punës së ekipit. Personalisht, po kaloj momente të mira dhe dëshiroj të vazhdoj kështu”, përfundoi Ronaldo.