SHBA kritikon zgjedhjet në Bjellorusi

Shtetet e Bashkuara të Amerikës kanë kritikuar zgjedhjet parlamentare në Bjellorusi.

Departamenti amerikan i Shtetit ka cituar një vlerësim paraprak të Organizatës për Siguri dhe Bashkëpunim në Evropë, e cila ka thënë se votimet nuk kanë qenë konkurruese që nga fillimi, për shkak të zgjedhjes së kufizuar për votuesit, anshmërisë së Komisionit Zgjedhor dhe mungesës së procedurave të duhura të numërimit.

Asnjë anëtar i opozitës në Bjellorusi nuk ka siguruar hyrjen në Parlamentin prej 110 vendesh.

Zëdhënësja e Departamentit amerikan të Shtetit, Victoria Nuland, ka thënë se respektimi i demokracisë dhe të drejtave të njeriut në Bjellorusi, përfshirë lirimin dhe rehabilitimin e të gjithë të burgosurve politikë, mbeten thelbësore për përmirësimin e marrëdhënieve dypalëshe me Shtetet e Bashkuara.