SHBA përshëndet marrëveshjen Prishtinë-Beograd

Ambasadorja amerikane në Serbi, Mary Warlick, tha se Shtetet e Bashkuara përshëndesin përparimin në dialogun ndërmjet Beogradit e Prishtinës dhe presin hapa të mëtejshem në këto bisedime. “Shpresojmë se gjatë ditëve dhe javëve që vijnë do të bëhet përparim shtesë në marrëveshje dhe zbatimin e tyre dhe Serbia mund të vazhdojë me hapa drejt anëtarësimit në BE”, u tha Mary Warlick, gazetarëve në Kuvendin e Serbisë, në Beograd.

Më tej ajo theksoi se “e përshëndesim marrëveshjen për dialogun ndërmjet Beogradit e Prishtinës dhe e inkurajojmë vazhdimin e përparimit në dialog për shumë çështje”. Sipas saj, është në interesin e të dy popujve që të vazhdojnë bisedimet ndërmjet Serbisë e Kosovës. Duke u shprehur për zhvillimet në veri, ambasadorja Mary Warlick, tha se ata dëshirojnë të shohin më tepër paqe në veri të Kosovës, kërkojnë gjithashtu heqjen e barrikadave, që bllokojnë qasjen e përfaqësuesve të bashkësisë ndërkombëtare, në mënyrë që ata të mund të kryejnë punën e tyre”.

Arritja e një marrëveshjeje mes Edita Tahirit dhe Borisllav Stefanoviçit nuk do të garantonte heqjen e barrikadave në veri të Kosovës- shkruajnë mediat kosovare. Refuzimi i kryetarëve ilegalë të komunave në veri të Kosovës për zbatimin e marrëveshjes eventuale do të bënte të pamundur jetësimin e saj dhe kthimin e normalitetit në rrugët e veriut.