SHBA, vetëvritet i fejuari i numrit dy në botë në tenis

Një ngjarje e rëndë ka tronditur mëngjesin e ditës së sotme Shtetet e Bashkuara të Amerikës pasi në Majemi i ka hequr jetën vetes ish-lojtari i hokejit në akull, Konstantin Koltsov.

Mësohet se 42-vjeçari është hedhur nga ballkoni i resortit “St Regis Bal Harbour”. Bjellorusi ndodhej në Florida pasi kishte shkuar për të mbështetur në “Miami Open” të fejuarën e tij, Arina Sabalenka.

Sipas Policisë së Majemit, 42-vjeçari është hedhur me dashje nga ballkoni i resortit me pesë yje.

Sa i përket dinamikës së ngjarjes apo shkakut, i cili ka shtyrë ish-lojtarin e Pitsburg “Penguins” të kryente aktin fatal ende nuk është mësuar asgjë.  

E fejuara e tij, e cila momentalisht është numri dy në glob, mësohet se nuk është tërhequr nga pjesëmarrja në “Miami Open”, por ka bërë me dije se pas ndeshjeve nuk do të jetë e gatshme për t’u shfaqur përballë gazetarëve për të dhënë konferenca për shtyp.