SKANDALI i arrestimit të Fatos Skejës/ Policia e ndalon, prokuroria e lëshon në mirëbesim
Fatos Skeja
Nga Lindita Çela
Ish- shoferi personal i Shkëlzen Berishës, Fatos Skeja ka mundur të dalë nga masa e ndalimit falë prokurores së çështjes, Elisabeta Marku, e cila ka kërkuar ndjekje në gjendje të lirë të tij.
Skeja, i cili u ndalua për shkak të një afere për vënie gjobe 100 mijë euro, ngjarje në të cilën është përfshirë dhe makina e ish- prokurorit të Kukësit, tashmë në Shkodër, Xh.L., duket se përfundoi si një vizitë tek zyra e drejtorit të Policisë së Qarkut të Tiranës, Bernard Çaushaj.
Ndërsa në mesditë u fol gjatë për arrestimin e ish- gardistit, i cili u bë i njohur pas presionit ndaj familjes së një prej protestuesve të vrarë me 21 janar, Hekuran Dedës, drejtoria e Policisë së Tiranës nuk ka dhënë asnjë sqarim për këtë ngjarje.
Burime të besueshme i thanë TemA-s se përgjatë dy orëve që ish- gardisti ka ndenjur në ambientet e Policisë së Tiranës, ai ka qëndruar në zyrën e Çaushajt.
Ndalimi i Skejës, policia i përplas makinën me dhunë
Fatos Skeja është arrestuar pas një operacioni të menduar policor, duke i ngushtuar rrugën makinës së tij derisa ia bllokuan kalimin.
Operacioni, i cili ishte një stimulim i një eskorte policie që shoqëronte lekë, bëri të mundur ndalimin e Skejës, i cili i rezistoi urdhrit të ndalimit.
Pas kësaj ai u shoqërua në mjediset e Policisë së Tiranës dhe aty filloi presioni mbi policinë për ta liruar nga prokurorja e çështjes, e cila njihet si njeri i afërt i Shkëlzen Berishës. Burime nga prokuroria bëjnë të ditur se prokurorja e çështjes mund të ndërrohet ditën e nesërme duke e lënë të paqartë të ardhmen e ndjekjes së çështjes.
Arsyetimi kryesor i prokurorisë është se Skeja është person i njohur prej tyre dhe mund të ndiqet në gjendje të lirë.
Viktima e të paditurit ka qenë emigrant shqiptar, të cilit i janë kërkuar 100 mijë euro.
Makina e përfshirë në ngjarje ka qenë një makinë e ish- prokurorit të Kukësit, tashmë në Shkodër.
Sipas burimeve të pakonfirmuar zyrtarisht, thuhet se Skeja është njoftuar dy ditë më parë për hapjen e një procesi hetimor ndaj tij për gjobëvënie, që sipas lajmeve të raportuara, kap vlerën e 100 mijë eurove.
Po ti çne që vjen vërdallë, ndaj teje ka një hetim për gjobëvënie, thuhet se persona të caktuar kanë informuar ish-gardistin.
Përplasja për 21 Janarin
Ish- gardisti ka qenë në qendër të vëmendjes së opinionit publik, jo vetëm për faktin se ai shërbente si shofer i djalit të ish-kryeministrit Sali Berisha, por edhe për shkak të përfshirjes së tij në biznese me njerëz, jo vetëm të përfolur në botën e krimit, por dhe me lidhje të afërta me krerët e qeverisë që shkoi.
Po kështu, Skeja u denoncua nga vëllai i Hekuran Dedës, se ka qenë pikërisht ai, që në këmbim të mikpritjes së Sali Berishës në ceremoninë mortore, jo vetëm që do i ofronte para, por dhe do ti rrëfente vrasësin.
Pas këtij denoncimi, Skeja paditi familjen e Hekuran Dedës për shpifje.
Edhe pse familjarët e Hekuran Dedës nuk u thirrën kurrë për të dëshmuar mbi këtë ngjarje, paradoksalisht gjykata vendosi të gjobisë me një milion lekë Zabit Dedën, me argumentin se ka deklaruar të dhëna të pavërtetueshme.