SPAK jep detajet për akuzat ndaj shefes së Shërbimit Sekret dhe dy të tjerëve
Prokuroria e Posaçme kundër Korrupsionit dhe Krimit të Organizuar po zhvillon hetime në kuadër të procedimit penal nr. 20/1 të vitit 2025.
Pas kërkesës së SPAK, Gjykata e Posaçme e Shkallës së Parë ka caktuar, me vendimin nr. 67, datë 21 shtator 2026, disa masa sigurimi ndaj personave nën hetim.
Për Vlora Hysenin, me detyrë drejtor i Shërbimit Informativ Shtetëror, është caktuar masa “arrest në shtëpi”, si dhe “pezullim i ushtrimit të një detyre a shërbimi publik”. Ajo po hetohet për veprat penale të parashikuara nga nenet 302/2 dhe 295/a/1 të Kodit Penal.
Ndërkohë, për Fation Kalluçin, me detyrë përgjegjës sektori në Institutin e Policisë Shkencore, është caktuar masa “arrest në burg”, për veprën penale të parashikuar nga neni 295/a/1 i Kodit Penal.
Masa “arrest në burg” është caktuar edhe për Embro Sylejmanin, punonjës i shoqërisë “Agroturizëm Kodra e Kuajve”, i hetuar për veprën penale të parashikuar nga neni 302/2 i Kodit Penal.
Sponsorizuar
Vendimet i janë dërguar Policisë së Shtetit, e cila ka ekzekutuar dy prej masave të sigurisë.
Në kuadër të të njëjtit hetim, me vendimin nr. 618, datë 20 shtator 2026, Gjykata e Posaçme ka lejuar kontrollin e banesës dhe kontrollin personal të shtetasit I.P., ish-funksionar i lartë i Policisë së Shtetit.
Gjithashtu, me vendimin nr. 619, datë 21 shtator 2026, gjykata ka lejuar kontrollin e kompleksit të vilave në kryqëzimin e rrugës “Durrësi në Shekuj” me rrugën “Bajram Tusha”, në zonën e Shkozetit, Durrës.
Masat dhe kontrollet janë kryer në kuadër të hetimeve të SPAK për procedimin penal nr. 20/1 të vitit 2025.
- Neni 302/2 – “Përkrahja e autorit të krimit”: kur ndihma për t’i shpëtuar kërkimit, kapjes ose arrestimit i jepet autorit të një prej veprave penale të listuara në këtë paragraf, dënimi është burgim nga 2 deri në 7 vjet. Ndihma mund të jetë sigurimi i ushqimeve, mjeteve të jetesës, banesës, vendqëndrimit apo në mënyra të tjera.
- Neni 295/a/1 – “Zbulimi i akteve ose të dhënave sekrete”: dënon me gjobë ose burgim deri në 5 vjet zbulimin ndaj të tretëve të të dhënave që ligji i përcakton si sekret, ose ndihmën për zbulimin e tyre, nga një funksionar publik ose person i ngarkuar me shërbim publik, kur kjo bëhet në kundërshtim me detyrën ose duke abuzuar me funksionin.