SPAK konfirmon thirrjen e Berishës për ta pyetur për ‘21 Janarin’: Fletëthirrja iu dorëzua gjatë zbatimit të masës ‘detyrim paraqitje ’

Sali Berisha, ish-Kryeministër i Shqipërisë dhe lider i Partisë Demokratike, ka nënshkruar sot urdhër-thirrjen lidhur me procedimin penal nr. 138 të vitit 2024, që ka të bëjë me ngjarjet e 21 Janarit 2011, kur katër qytetarë humbën jetën gjatë protestës së opozitës.

Gjatë zbatimit të masës “detyrim paraqitje”, Berisha është njohur me detajet e procedimit dhe është ftuar të paraqitet në Prokurorinë e Posaçme më datën dhe orën e caktuar për të dhënë dëshminë e tij. Ky veprim është pjesë e hetimeve që lidhen me përgjegjësitë për incidentet e asaj dite, ku forcat e rendit hapën zjarr ndaj protestuesve.

Kjo është një zhvillim i ri në çështjen e njohur si “21 Janari”, e cila vazhdon të mbetet një çështje delikate dhe e ndjeshme për politikën dhe shoqërinë shqiptare. Prokuroria e Posaçme ka nisur hetime për të zbardhur plotësisht ngjarjet dhe për të përcaktuar përgjegjësitë penale, përfshirë ato të liderëve politikë dhe zyrtarëve të tjerë të lidhur me incidentet.

Berisha, i cili ka qenë i përfshirë në atë periudhë si kryeministër, ka mohuar çdo përgjegjësi lidhur me incidentet e 21 Janarit, por ky hetim do të sjellë më shumë informacion dhe zhvillime lidhur me çështjen.