Samiti Rusi-BE, diskutohet ndalimi i importit të perimeve

Ndalimi i importeve të perimeve të Bashkimit Evropian nga ana e Rusisë pritet të jetë në qendër të diskutimeve në samitin mes Rusisë dhe Bashkimit Evropian që po mbahet në qytetin Nizhny Novgorod.

Javën e kaluar Rusia ndaloi importimin e perimeve të freskëta nga 27 vendet anëtare si reagim ndaj shpërthimit të bakterit vdekjeprurës të  E. Coli, si pasojë e të cilit gjetën vdekjen e 27 personave, kryesisht në Gjermani.

BE ka kundërshtuar ndalesën, për të cilën zyrtarët thonë se nuk ka bazë shkencore dhe se mund të bie ndesh me rregullat e Organizatës Botërore të Tregtisë, të cilës Rusia po kërkon t`i bashkohet.

Samiti dy ditor mblodhi së bashku presidentin rus Dimitri Mevdedev, presidentin e Komisionit Evropian, Hose Manuel Barroso dhe presidentin e BE-së, Herman von Rompej.