Samiti i Komunitetit Politik Europian, Qeveria cakton 15–16 majin si ditë pushimi për administratën në disa bashki

Qeveria ka vendosur caktimin e 15 dhe 16 majit si ditë pushimi për punonjësit e administratës shtetërore në Tiranë, Kamzë, Vorë dhe Krujë, me përjashtim të Forcave të Armatosura, të Policisë së Shtetit, të Gardës së Republikës, të shërbimit zjarrfikës dhe të punonjësve të sistemit shëndetësor.

Sipas vendimit, këto dy ditë pushimi do të zëvendësohen brenda vitit 2025.

Ky vendim vjen në kuadër të Samitit të Komunitetit Politik Europian, që më 16 maj do të presë në Tiranë liderët e kontinentit nga Londra në Kiev e nga Osloja në Ankara.

“VENDIM PËR CAKTIMIN E DATAVE 15 DHE 16 MAJ 2025 DITË PUSHIMI PËR PUNONJËSIT E DISA INSTITUCIONEVE TË ADMINISTRATËS SHTETËRORE

Në mbështetje të neneve 95, pika 2, dhe 100, të Kushtetutës, me propozimin e Kryeministrit, Këshilli i Ministrave

VENDOSI:

1. Caktimin e datave 15 dhe 16 maj 2025 ditë pushimi për punonjësit e institucioneve të administratës shtetërore, me seli në territoret e bashkive Tiranë, Kamzë, Vorë dhe Krujë, me përjashtim të Forcave të Armatosura, të Policisë së Shtetit, të Gardës së Republikës, të shërbimit zjarrfikës dhe të punonjësve të sistemit shëndetësor.

2. Dita e punës së datave 15 dhe 16 maj 2025, për punonjësit e institucioneve të administratës shtetërore, sipas pikës 1 të këtij vendimi, do të zëvendësohet në ditët e pushimit brenda vitit 2025.

3. Ngarkohen institucionet e administratës shtetërore, të përmendura në pikën 1, për zbatimin e këtij vendimi”, thuhet në vendimin e qeverisë.

/rtsh.al/