Sekuestrohen droga e futur në Maqedoni nga Shqipëria

Kumanovë (Start)- Një sasi e konsiderueshme lënde narkotike të llojit Marijuanë, është sekuestruar gjatë fundjavës në Maqedoni. Ministria e Punëve të Brendshme maqedonase, ka bërë të ditur se bëhet fjalë për sekuestrimin e 51.5 kilogramëve të lëndës narkotike në fjalë që është sekuestruar gjatë dy operacioneve të policisë maqedonase. Të njëjtat burime citojnë se droga vinte në mënyrë ilegale nga territori i Republikës së Shqipërisë, që duke përdorur si vend tranzit Maqedoninë do të dërgohej drejt vendeve të perëndimit. Ndërkohë, është ngritur padi ndaj pesë personave të cilët mendohet të jenë pjesë e një rrjeti ndërkombëtarë trafikimi lëndësh narkotike. Vlera e Marihuanës arrin deri në 70 mijë euro. Aksioni policor për kapjen e 5 të dyshuarve është kryer në mes të fshatrave Hotël dhe Mateç të komunës së Likovës ndërsa aksioni tjetër është kryer në qendrën tregtare Ramstor në Shkup.