Shaqiri i priste vërshëllimat

Xherdan Shaqiri e kishte pritur një atmosferë të zjarrtë në stadiumin ‘SwissportArena’ të Luzernit në përballjen ndërmjet Zvicrës dhe Shqipërisë. Mirëpo, futbollisti shqiptar që e përfaqëson vendin helvetik thotë se nuk ua vuri veshin fort tifozëve, pasi u koncentrua në lojë për ta dhënë më të mirën për ekipin e tij.

Dhe, qasja e tij ishte e duhur, pasi që ai e kaloi ekipin e Ottmar Hitzfeldit në epërsi në minutën e 23-të, pas një gabimi të mbrojtjes shqiptare. “E dinim se do të ishte një ndeshje emocionuese. I prisnim edhe vërshëllimat, por jemi koncentruar në lojë”, tha 20 vjeçari për mediat zvicerane pas lojës.

Mirëpo, edhe pse shënoi, futbollisti i Bayern Munichut u mbajt si burrat. “E kam thënë se nuk do të festoj, nëse do të shënoja. Dhe, këtë e bëra, sepse kam respekt për Shqipërinë dhe për shqiptarët. E keni parë që nuk jam gëzuar, por e kam vendosur dorën në zemër”, shtoi ish futbollisti i Baselit.

Shaqiri nënvizoi se sulmi i Zvicrës nuk funksionoi në mënyrën më të mirë, por është i lumtur që ekipi i tij e kapi fitoren e dytë, duke e vazhduar sigurt rrugën drejt kualifikimit në botërorin ‘Brazili 2014’.