Shitet për 80 milionë dollarë

Piktura “Child With a Dove” (Fëmija me Pëllumb), të cilën Pablo Picasso e kishte krijuar në moshën 20-vjeçare, po shitet nga pronari aktual. Supozohet se ajo do të arrijë një çmim prej afro 80 milionë dollarë.

Njoftimi për vënien e pikturës në shitje është publikuar në web-faqen e Art Council England, sipas së cilës veprat e tilla është e lejueshme të shiten edhe jashtë vendit.

Piktura “Child With a Dove” është krijuar në vitin 1901, dhe ajo shënon fillimin e ‘Fazës së Kaltër’ të mjeshtrit spanjoll. Piktura, e cila shfaq fëmijën që në duar mban një pëllumb, dhe një top me ngjyra afër tij, i takon familjes Aberconway dhe ajo vitin e kaluar ishte huazuar për ekspozim në Londër nga Courtauld Gallery.

Sipas Arts Council England, vlera e veprës llogaritet të jetë rreth 80 milionë dollarë, megjithëse ky është vetëm një vlerësim i përafërt.

Një pikturë tjetër e Picassos, “Nude, Green Leaves and Bust”, është shitur në një ankand të vitit 2010 për 106.5 milionë dollarë.