Shkendija elektrike, digjet "Ujevara"

Nje lokal ne qytetin e Fierit eshte djegur gjate nates, ndersa dyshohet se shkak ka qene nje problem elektrik. Burime nga Drejtoria e Policise se Qarkut te Fierit bene te ditur se mengjesin e djeshem eshte gjetur i shkrumbuar bar "Ujevara" me pronar Sokol Muratin. Lokali mendohet te jete perfshire nga flaket rreth ores 02.00 te mengjesit. Ka qene nje polic roje i nje banke private ai qe ka pikasur i pari flaket dhe ka njoftuar si sallen operative te policise se Fierit, ashtu edhe sherbimin zjarrfikes. Ne vendngjarje kane shkuar zjarrfikesit si dhe grupi i eksperteve te policise se Fierit. Me pas jane njoftuar edhe pronari se bashku me punetoret qe kane shkuar edhe ata ne vendngjarje. Flaket e rena ne brendesi te lokalit kane shqetesuar edhe familjaret qe banojne ne katet e siperme te pallatit katerkatesh. Sipas burimeve nga zjarrfikesit, mesohet se lokali kishte vetem pak kohe qe kishte bere rikonstruksion. Vetem disa ore para se lokali te mbyllej, ne te kishte pasur nje fluks te larte klientesh, te cilet kane ndjekur ndeshjet e Kampionatit Europian te futbollit. Sipas burimeve policore mesohet se shkaku i renies se zjarrit ka qene frigoriferi dhe kabulli i televizorit qe kane dhene shkendijen e pare elektrike. Perhapja e flakeve eshte ndihmuar nga mobilimi me lende drusore i lokalit. Paraprakisht mendohet se demi material arrin nje vlere prej afro 500 mije lekesh, ndersa lokali ka qene i siguruar prane nje kompanie te kesaj fushe.

Xh.Beharaj