Shpërthimi i bombës 500 kilogramëshe ende nuk është bërë

Shpërthimi i kontrolluar i bombës 500 kilogramëshe, që është gjetur në “Kodrën e Goleshit” nuk është bërë ende.

Ndonëse ishte planifikuar të bëhet të shtunën në mënyrë të kontrolluar, njësiti i çminimit i FSK-së dhe KFOR-i Amerikan, nuk ishin të përgatitur për ta bërë një gjë të tillë për shkak të përmasave të bombës.

Shpërthimi i bombës paraqet rrezik dhe për këtë duhet të ndërmerren hapat adekuat për siguri dhe evakuim të qytetarëve rreth hapësirës në diametër prej dy kilometrash,raporton ktv. Punëtorët e gurëthyesit “Eko-kos” që e gjetën bombën thonë se janë me fat. Bomba kasetore dhe manuale e prodhimit anglez ishte gjetur nga ta, përderisa po kryenin punët në terren.

Sipas pjesëtarëve të FSK-së, bomba është mbetje nga lufta e fundit në Kosovë dhe është më e madhja e gjetur ndonjëherë që nga përfundimi i luftës./Indeksonline/