Shqiptar apo tradhtar ?
Një foto e mesfushorit të ri të Bayern Munichut, Xherdan Shaqiri e publikuar në rrjetin social Facebook ka tërbuar një numër të konsiderueshëm të përdoruesve – pa dyshim shqiptarë - që e thërrasin “tradhtar” dhe madje përdorin edhe fjalë fyese në drejtim të tij.
Por, pati edhe të atillë që mbronin vendimin e tij. Edhe pse duhen edhe thuajse tre javë deri në ndeshjen Zvicër-Shqipëri, që do të luhet më 11 shtator, polemikat dhe tensionet kanë nisur të dalin në sipërfaqe.
Nëse çështja e biletave ishte dhe është një nga më të nxehtat, këtu duhet futur edhe ‘urrejtja’ nga një numër i madh i tifozëve kuq e zi për futbollistët që zgjodhën fanellën e Zvicrës dhe jo atë të Shqipërisë, edhe pse vendlindja e tyre është në Kosovë dhe jo në vendin helvetik.
Momentalisht janë pesë shqiptarë në Kombëtaren e Zvicrës (Granit Xhaka, Xherdan Shaqiri, Valon Behrami, Blerim Xhemajli dhe Admir Mehmedi), por ka mjaftuar gjesti i njërit prej tyre për të ndezur polemikat ku fyerjet s’kanë munguar. Është rasti i yllit të ri të gjigantit bavarez, Shaqirit, që u largua nga Baseli si lider dhe fitues i titullit dhe ka bërë menjëherë për vete tifozët e Bayernit, por dhe kritikët që e krahasojnë me legjendën Mehmet Scholl.
Mesfushori i lindur në Gjilan, duke pozuar me fanellën e Kombëtares së Zvicrës, bashkë me shokun e skuadrës Gokhan Inler (po ashtu futbollist i natyralizuar), pasi ka hequr fanellën, ka shfaqur një vizatim të bërë mbi zemrën. Nuk ishte një simbol, por flamuri i kuq me kryq të bardhë i Zvicrës. Një foto që ka ngjallur tërbimin e tifozëve në rrjetin social “Facebook”.
Aty ka nisur një debat i ashpër mes atyre që e mbronin dhe atyre që e fyenin dhe e akuzonin si tradhtar. Por, kishte edhe të atillë që e mbronin atë. Shaqiri në faqen e tij zyrtare shpesh shkruan në shqip. Ndërsa për disa mesfushori s’ka asnjë faj që ka zgjedhur Zvicrën, pasi e ka shkolluar dhe i ka dhënë mundësi të shkëlqejë.
Shaqiri në të shkuarën është duartrokitur nga shqiptarët, pasi në këpucët e tij të futbollit ka treguar flamurin kosovar dhe atë shqiptar, duke dhënë idenë se ende ndien për atdheun e tij. Gjithashtu, ai bashkë me Granit Xhakën janë akuzuar nga mediet helvete se nuk këndojnë himnin.
Shqipëria do të luajë ndeshjen e saj të parë të grupit ndaj Qipros më datën 7 shtator në stadiumin “Qemal Stafa”, ndërsa të dytën do të luajë katër ditë më pas, më 11 shtator, në Lucern, në stadiumin “Swissporarena” ndaj Zvicrës.