Shtohen aksidentet rrugore, 354 të vdekur në një vit

Pakujdesia e ndihmës së parë, 27% e të plagosurve vdesin pa shkuar në spital. Shkelja e rregullave të qarkullimit, shpejtësia dhe makinat e vjetra renditen si shkaktarët kryesorë të aksidenteve

Vdekshmëria nga aksidentet rrugore në vendin tonë është rritur me 30% krahasuar me vitet e mëparshme. Shifrat flasin për bilanc tragjik aksidentesh, nga të cilat vetëm brenda një viti kanë vdekur 354 persona, ndërkohë që janë plagosur 1540 të tjerë. Shqetësimi për këtë fenomen të vazhdueshëm në rrugët shqiptare ngrihet nga Organizata Botërore e Shëndetësisë (OBSH) dhe Ministria e Shëndetësisë, të cilat do të ndërmarrin një nismë të përbashkët për sensibilizimin e qytetarëve për aksidentet, në mënyrë që edhe ndërhyrja e parë të jetë profesionale dhe jo e rastësishme. Sipas të dhënave të Ministrisë së Shëndetësisë, 27% e viktimave të plagosur gjatë aksidenteve kanë humbur jetën nga pakujdesia në dhënien e ndihmës së parë. Përsa i moshës së drejtuesve të mjeteve që humbin jetën apo plagosen në aksidente, 78% e tyre i përkasin moshës 18-44 vjeç. Ndër shkaqet e aksidenteve, renditen disa, por më të rëndësishmit, që kanë sjellë edhe numrin më të madh të tyre, janë: shkelja e rregullave të qarkullimit në 78,8% të rasteve, shpejtësia tej normës për 29% të vdekjeve dhe 32% të plagosjeve, si dhe përdorimi i alkoolit 6.7%. Por midis shkaktarëve kryesorë në ndodhjen e aksidenteve nuk ngelet pas vjetërsia e automjeteve, ku rreth 72% e tyre janë të amortizuar me vjetërsi mbi 10-vjeçare, duke sjellë për pasojë që mbi 90% e aksidenteve rrugore të shkaktohen nga makina të vjetra. Ndërsa kostoja e aksidenteve rrugore, e llogaritur nga Ministria e Shëndetësisë, është 106 milionë euro humbje në vit. Një nismë e përbashkët e Ministrisë së Shëndetësisë dhe OBSH, në kuadër të dekadës së sigurisë rrugore 2011-2020, ka mbledhur dje për të parën herë në një tryezë të rrumbullakët specialistë të fushës, përfaqësues të qeverisë dhe të Parlamentit. Ministri i Shëndetësisë, Petrit Vasili, gjatë fjalës përshëndetëse është shprehur se jo rastësisht Kombet e Bashkuara kanë zgjedhur OBSH si ndjekëse të këtij problem. Ky vendim i referohet lidhjes së drejtpërdrejtë që kanë pasojat e sigurisë rrugore dhe aksidenteve dhe shëndetit. “Së bashku me të gjithë aktorët e faktorët e tjerë, jemi në këtë tavolinë për të diskutuar në 360 gradë në lidhje me këtë problematikë të shëndetësisë. Kjo problematikë na ka sjellë një sërë pasojash, qoftë në pikëpamje shëndetësore, qoftë në atë ekonomike”, - tha ministri Vasili. Sipas tij, një nga elementet e rëndësishme është transporti dhe ndihma e shpejtë që u jepet qytetarëve.

Situata në Shqipëri

Në vitin 2002

308 aksidente

250 të vdekur

228 të plagosur

Në vitin 2010

1630 aksidente

354 të vdekur

1540 të plagosur

Të dhëna për vdekjet

30% është rritur numri i të vdekurve nga aksidentet rrugore

35% e të vdekurve dhe të plagosurve janë këmbësorë

65% e të vdekurve janë drejtues mjetesh dhe pasagjerë

76% e këmbësorëve që vdesin janë fëmijë dhe të moshuar

78% e shoferëve që vdesin dhe plagosen, të moshës 18-44 vjeç

27% e të plagosurve rëndë humbin jetën gjatë transportit

Shkaqet e aksidenteve

90% e aksidenteve rrugore shkaktohen nga automjete të vjetra

78,8% e tyre janë nga shkelja e rregullave të qarkullimit

29% e vdekjeve dhe 32% e plagosjeve, nga shpejtësia tej normës

19% nga shkelja e rregullave të qarkullimit nga këmbësorët

6.7% të rasteve kanë ndodhur nga përdorimi i alkoolit

2.2% e aksidenteve nga shkaqe natyrore dhe mangësi teknike