Shtyhen preferencat
Kthimi i preferencave tregtare me Bashkimin Evropian nuk do të ndodhë shumë shpejt siç është thënë nga autoritetet kosovare.
Ata konfirmojnë se janë njoftuar se rikthimi i këtyre preferencave është shtyrë për çështje procedurale, dhe nuk ka të bëjë asgjë me zhvillimet politike në vend.
Zëvendëskryeministrja e Kosovës, njëherësh ministre e Tregtisë dhe Industrisë, Mimoza Kusari - Lila thotë se ende janë në pritje.
“Disa herë na është konfirmuar se shtatori është afati kur do të kthehen preferencat tregtare të Bashkimit Evropian, por tash së fundi, javën e kaluar e kemi marrë konfirmimin se është shtyrë për shkak të çështjeve procedurale dhe nuk ka të bëjë asgjë me procesin, gjegjësisht me rrjedhat politike në Kosovë, por ka të bëjë më një procedurë të Parlamentit Evropian”, thekson Kusari - Lila.
Sidoqoftë, Kusari – Lila bën të ditur se institucionet e BE-së po mundohen që përmes Komisionit Evropian të arrijnë një konsensus që së shpejti kjo çështje të zgjidhet, por nuk është më çështje e cila rëndon dhe pret aktivitet nga institucionet e Kosovës.
Nga fillimi i këtij viti, Kosova nuk i gëzon preferencat tregtare, të cilat i vendos Bashkimi Evropian për të gjitha vendet e Ballkanit Perëndimor.
Autoritetet kosovare patën deklaruar se Kosova i humbi këto preferenca si rrjedhojë e një problemi politik, “i cili është iniciuar prej vullnetit të mirë të shteteve mike të Kosovës”, për të ndërruar emërtimin e Kosovës, gjegjësisht jo të jetë e thirrur si Kosovë, sipas Rezolutës 12 44, por të jetë e thirrur si Kosovë pa ndonjë paragjykim ndaj statusit.
më së shumti në mungesë të tyre humbjet ekonomike janë rritur.
Këtë e pranon edhe Kusari-Lila.
“Po natyrisht ka humbje, nuk jemi të sigurt për vlerën e saktë, por përveç humbjeve aktuale që mund të jenë, janë humbjet si kostoja oportune, që do të thotë shumë biznese kanë humbur shansin në tregun evropian”, shprehet Kusari - Lila.
Një ndër bizneset e shumta të cilat kanë pësuar nga mosvazhdimi i preferencave tregtare është Vreshtaria dhe Veraria “Stone Castle” në Rahovec.
Menaxheri i kësaj kompanie, Shani Mullabazi, thotë se humbjet në këtë kompani janë shumë të mëdha.
“Kjo biznesit tonë i shkakton dëme të mëdha dhe nëse nuk bëhet zgjidhje e shpjetë, ne jemi të detyruar që të gjithë blerësve tanë në Evropë t’ua kthejmë pagesat e doganave që ato i kanë bërë gjatë blerjes së verës sonë, dhe kjo nuk është vlerë e vogël, dhe e gjithë kjo do të na shkaktojë dëme të mëdha në afarizmin tonë”, thekson ai.
Produktet kosovare që nga fillimi i këtij viti nuk mund të eksportohen në vendet e Bashkimit Evropian, pa iu nënshtruar tarifave doganore apo kufizimeve për sasitë.
Mullabazi kërkon nga institucionet e Kosovës që të marrin hapa konkret në rikthimin e këtyre preferencave tregtare.
“Duhet një angazhim shumë më i madh i njerëzve kompetentë, dhe kjo marrëveshje të rikthehet, sepse Kosova ka eksport shumë të vogël, dhe nëse nuk ka masa për mbështetje normale të konkurrueshmërisë në treg, eksporti i Kosovës do të shuhet në tërësi”, thekson Mullabazi.