Siri: 9 persona të vrarë, shkelen premtimet për ndalje të dhunës

Aktivistët për të drejtat e njeriut thonë se trupat e Sirisë sot kanë vrarë nëntë persona, vetëm një ditë pasi qeveria i premtoi Ligës Arabe, se do të ndalë dhunën kundër protestuesve.

Grupi Vëzhgimi Sirian, me seli në Londër, ka cituar dëshmitarët, që kanë thënë se nëntë civilë janë vrarë në provincën e trazuar Homs.

Homs është qendra e protestave kundër regjimit të presidentit Bashar al-Asad.

Ditë më parë Presidenti i Sirisë, Bashar Al Asad pranoi planin udhërrëfyes të Ligës Arabe, për t`i dhënë fund dhunës në vend.
I përbërë nga katër pika, plani parashikonte ndër të tjera edhe hapjen e vendit për vëzhguesit e Ligës Arabe dhe Mediave Ndërkombëtare.

Marrëveshja e arritur parashikonte fundin e menjëhershëm të dhunës dhe zmbrapsjen e tankeve nga rrugët, për t`i dhënë garanci njerëzve, përpara se të nisë dialogu kombëtar.
Prej 15 Marsit deri më sot, të pakten 3000 persona janë vrarë gjatë përleshjeve mes protestuesve dhe forcave të sigurisë.